ເກີດເຫດໂຈມຕີດ້ວຍລະເບີດລົດ 2 ຄັນ ໃນເຂດພື້ນທີ່ຂອງຊາວຊີອະ ທີ່ຢູ່ທາງຕາເວັນອອກສຽງເໜືອຂອງນະຄອນຫລວງ
ແບັກແດັດ ມີຜູ້ເສຍຊີວິດຢ່າງໜ້ອຍ 12 ຄົນ.
ສຳນັກຂ່າວຕ່າງປະເທດລາຍງານວ່າ ເກີດເຫດລະເບີດຂຶ້ນທີ່ລານຈອດລົດ ໃນເຂດຕັນບິຢະ ໃນວັນອັງຄານ 21 ຕຸລາຜ່ານ
ມາ ເຮັດໃຫ້ມີຜູ້ເສຍຊີວິດຢ່າງໜ້ອຍ 12 ຄົນ ແລະ ໄດ້ຮັບບາດເຈັບອີກຢ່າງໜ້ອຍ 40 ຄົນ ເຊິ່ງນັບເປັນຄັ້ງລ່າສຸດຂອງການ
ກໍ່ເຫດໃຊ້ລະເບີດໂຈມຕີຫລາຍຄັ້ງໃນຊ່ວງທີ່ຜ່ານມາ ໂດຍມຸ່ງເປົ້າໃສ່ຊາວມຸດສະລິມນິກາຍຊີອະ ເຊິ່ງເປັນຄົນສ່ວນໃຫຍ່ໃນ
ນະຄອນຫລວງແບັກແດັດ ຈົນເຮັດໃຫ້ຍອດຜູ້ເສຍຊີວິດ ທີ່ເກີດຈາກການໂຈມຕີດ້ວຍລະເບີດພາຍໃນຮອບ 3 ວັນ ແມ່ນ
ມີສູງເຖິງ 40 ຄົນແລ້ວ.
ດ້ານຜູ້ຢູ່ເບື້ອງຫລັງຂອງການກໍ່ເຫດດັ່ງກ່າວ ຍັງບໍ່ທັນອອກມາຖະແຫລງເຖິງຄວາມຮັບຜິດຊອບເທື່ອ ແຕ່ໃນຊ່ວງຜ່ານ
ມາ ກຸ່ມ IS ໄດ້ເຄີຍລະບຸວ່າ ພວກເຂົາເປັນຜູ້ກໍ່ເຫດໂຈມຕີລັກສະນະແບບນີ້ ຕໍ່ຊາວຊີອະ ໃນນະຄອນຫລວງແບັກແດັດ
ເມື່ອວັນອາທິດ ແລະ ວັນຈັນກ່ອນໜ້າ ເຮັດໃຫ້ມີຜູ້ເສຍຊີວິດຢ່າງໜ້ອຍ 33 ລາຍ ໃນສອງມື້ນັ້ນ.
ເນື່ອງຈາກກຸ່ມ IS ແລະ ກຸ່ມມຸດສະລິມນິກາຍສຸໜີ່ຫົວຮຸນແຮງ ມັກຈະເບິ່ງຊາວມຸດສະລິມນິກາຍຊີອະ ວ່າເປັນພວກ
ນອກຮີດ ໂດຍຈະກໍ່ເຫດໂຈມຕີຊາວຊີອະດ້ວຍລະເບີດຢູ່ຫລາຍຄັ້ງ ແລະ ຜູ້ເຄາະຮ້າຍສ່ວນໃຫຍ່ກໍເປັນພົນລະເຮືອນຜູ້
ບໍລິສຸດທັງສິ້ນ.