ຫຼາຍປະເທດທົ່ວໂລກທີ່ໃຊ້ ວັອດແອັບ ເປັນຫຼັກໄດ້ປ່ຽນມາໃຊ້ແອັບເທເລແກຣມ ແລະ ຊິກນັລ ເກືອບ 2.2 ລ້ານດາວໂຫຼດ ຫຼັງ ວັອດແອັບ ບັງຄັບແຊຣ໌ຂໍ້ມູນສ່ວນຕົວໃຫ້ເຟສບຸ໊ກ.
ວັນທີ 10 ມັງກອນ 2021, ເວັບໄຊທ໌ ເດິຊັນ ໄດ້ນຳສະເໜີຂ່າວວ່າ ມີລາຍງານວ່າ ອາທິດທີ່ຜ່ານມາ ຫຼາຍກວ່າ 100,000ຄົນ ຈາກທົ່ວໂລກ ເຊົາໃຊ້ໂປແກຼມສື່ສານວັອດແອັບ (WhatsApp) ຫຼັງຈາກທີ່ແຈ້ງໃຫ້ຜູ້ໃຊ້ຮູ້ວ່າພວກເຂົາຕ້ອງການແບ່ງປັນຂໍ້ມູນສ່ວນຕົວທີ່ລະອຽດອ່ອນໃຫ້ກັບເຟສບຸ໊ກ ຖ້າບໍ່ດັ່ງນັ້ນບັນຊີຈະຖືກປິດໃຊ້ງານ.
ໃນວັນທີ 6 ມັງກອນ 2021 ທີ່ຜ່ານມາ ວັອດແອັບ ໄດ້ກຳນົດເງື່ອນໄຂໃໝ່ ໂດຍຂໍໃຫ້ຜູ້ໃຊ້ຍິນຍອມທີ່ຈະໃຫ້ເຟສບຸ໊ກ ແລະ ບໍລິສັດໃນເຄື່ອຂ່າຍເກັບກຳຂໍ້ມູນສ່ວນຕົວຂອງຜູ້ໃຊ້ງານ ຖ້າບໍ່ດັ່ງນັ້ນ, ບັນຊີຈະຖືກປິດການນຳໃຊ້.
ໂດຍຂໍ້ມູນສ່ວນຕົວດັ່ງກ່າວ ຍັງລວມເຖິງຂໍ້ມູນໝາຍເລກໂທລະສັບ ບັນທຶກໄລຍະເວລາການໃຊ້ງານຄວາມຖີ່ທີ່ໃຊ້ວັອດແອັບ ຂໍ້ມູນກ່ຽວກັບວິທີ່ທີ່ຜູ້ໃຊ້ງານໂຕ້ຕອບກັບຜູ້ໃຊ້ລາຍອື່ນ ການລະບຸອຸປະກອນ ແລະ ລາຍລະອຽດທີ່ຢູ່ IP ລະບົບປະຕິບັດການ ລາຍລະອຽດເວັບເບຣົາເຊີ ຄວາມສົມບູນຂອງແບັດເຕີລີ ເວີຊັ່ນ ຂອງແອັບເຄືອຂ່າຍໂທລະສັບ ພາສາ ແລະ ເຂດເວລາເປັນຕົ້ນ.
ຈາກເຫດການດັ່ງກ່າວ ເຮັດໃຫ້ບັນດານັກເຄື່ອນໄຫວສັງຄົມມີຄວາມກັງວົນຕໍ່ຄວາມເປັນສ່ວນຕົວ ໄດ້ແນະນຳຜູ້ໃຊ້ປ່ຽນໄປໃຊ້ແອັບ apps ທີ່ມີຄວາມເປັນສ່ວນຕົວສູງ ເຮັດໃຫ້ຜູ້ໃຊ້ງານຫຼາຍລ້ານຄົນເລີກໃຊ້ວັດແອັບ ແລະ ຍົກຍ້າຍການໃຊ້ງານໄປທີ່ແອັບເທເລແກຣມ ແລະ ຊິກນັລ ພາຍໃນໄລຍະເວລາພຽງໜຶ່ງອາທິດທີ່ຜ່ານມາທັງໝົດນີ້ ຄາດວ່າຈະເປັນເພາະຜູ້ໃຊ້ມີຄວາມກັງວົນຕໍ່ຄວາມເປັນສ່ວນຕົວ.
ຮຽບຮຽງຂ່າວ: ພຸດສະດີ