ສູນຂ່າວສານການແພດສຸຂະສຶກສາ ກະຊວງສາທາລະນະສຸກໄດ້ອອກແຈ້ງການເມື່ອບໍ່ດົນມານີ້ໃຫ້ຮູ້ວ່າ: ອາຫານທະເລຍັງກິນໄດ້ ແຕ່ໃຫ້ຄຳນຶງເຖິງຄວາມສະອາດ ແລະ ຄວາມປອດໄພ, ລ້າງມືໃຫ້ສະອາດທັງກ່ອນ ແລະ ຫຼັງ ການຈັບອາຫານທະເລ, ສິ່ງສຳຄັນການກິນຕ້ອງຕົ້ມໃຫ້ສຸກດີ ໃນອຸນຫະພູມ 70 ອົງສາຂຶ້ນໄປ ປະມານ 5 ນາທີ.
ພາຍຫຼັງທີ່ພົບພໍ່ຄ້າທີ່ຂາຍອາຫານທະເລສົດ ຢູ່ປະເທດເພື່ອນບ້ານຕິດເຊື້ອພະຍາດໂຄວິດ-19 ແລະ ໄດ້ມີການແຜ່ເຊື້ອພະຍາດດັ່ງກ່າວອອກສູ່ສັງຄົມໂດຍໄດ້ເຮັດໃຫ້ມີຜູ້ຕິດເຊື້ອເພີ່ມຂຶ້ນເປັນຈໍານວນຫຼາຍນັ້ນ, ລັດຖະບານແຫ່ງ ສປປ ລາວ ໄດ້ສັ່ງໂຈະຊົ່ວຄາວ ເມື່ອບໍ່ດົນມານີ້ ກ່ຽວກັບການຫ້າມນໍາເຂົ້າອາ ຫານທະເລ ແລະ ແຊ່ແຂງທຸກປະເພດຈາກປະເທດເພື່ອນບ້ານ ໂດຍໄດ້ເນັ້ນໃຫ້ 6 ກະຊວງເອົາໃຈໃສ່ໃນການປ້ອງກັນການລັກລອບນຳເຂົ້າອາຫານປະເພດດັ່ງກ່າວ, ແຕ່ປັດຈຸບັນນີ້ ກໍຍັງມີອາຫານທະເລສົດ ແລະ ແຊ່ແຂງ ຈາກປະເທດທີ່ມີການແຜ່ເຊື້ອໂຄວິດ-19 ວາງຂາຍຢູ່ຕາມຕະຫຼາດຕ່າງໆໃນຂອບເຂດທົ່ວປະເທດ.
ເພື່ອປະຕິບັດຕາມການແຈ້ງການດັ່ງກ່າວ, ເຈົ້າໜ້າທີ່ສະເພາະກິດກະຊວງສາທາລະນະສຸກ, ເຈົ້າໜ້າທີ່ຫ້ອງການສາທາລະນະສຸກເມືອງໃນຂອບເຂດທົ່ວປະເທດ ໂດຍສົມທົບກັບເຈົ້າໜ້າທີ່ພະແນກການຄ້າ ນະຄອນຫຼວງ, ຫ້ອງການການຄ້າເມືອງ ແລະ ເຈົ້າໜ້າທີ່ພາສີ ໄດ້ລົງເຄື່ອນໄຫວກວດກາປະເພດອາ ຫານທະເລສົດຢູ່ຕາມຕະຫຼາດຕ່າງໆ ໂດຍຍັງພົບເຫັນວ່າມີການວາງຂາຍເປັນຈໍານວນຫຼາຍທັງທີ່ມີການຫ້າມນໍາເຂົ້າ ຊຶ່ງທາງເຈົ້າໜ້າທີ່ກ່ຽວຂ້ອງໄດ້ຢຶດອາຫານດັ່ງກ່າວຈໍານວນໜຶ່ງຍ້ອນພົບທີ່ມາບໍ່ຈະແຈ້ງ ແລະ ເອົາມາກວດຫາເຊື້ອພະຍາດໂຄວິດ-19 ຊຶ່ງຜົນການກວດແມ່ນພົບແຕ່ມີການໃຊ້ສານກັນບູດ ເຊິ່ງສານດັ່ງກ່າວກໍ່ເປັນອັນຕະລາຍແກ່ຊີວິດ ແລະ ສຸຂະພາບຂອງຜູ້ບໍລິໂພກ.
ຮຽບຮຽງຂ່າວ: ພຸດສະດີ