ອີງຕາມການລາຍງານຂ່າວຈາກ ແຂວງຫົວພັນ ໃຫ້ຮູ້ວ່າ ສານປະຊາຊົນແຂວງຫົວພັນໄດ້ພິຈາລະນາຕັດສິນຄະດີ ໃຫ້ທ້າວ ຄຳປະເສີດ ເຂົ້າຄຸກເປັນເວລາ 3 ປີ ພາຍຫຼັງທີ່ຜູ້ກ່ຽວມີພຶດຕິກຳທີ່ ເປັນການສ້າງຄວາມເສື່ອມເສຍແກ່ ອົງການພຸດທະສາດສະໜາ.
ທ້າວ ຄຳປະເສີດ ອາຍຸ 30 ປີ ຈຳເລີຍ ເປັນຄົນບ້ານດົງປ່າລານ ເມືອງສີສັດຕະນາກ ນະຄອນຫຼວງວຽງຈັນ, ໄດ້ໄປບວດຢູ່ຫຼວງພະບາງ ແລ້ວເດິນທາງໄປຈຳວັດຢູ່ວັດແຫ່ງໜຶ່ງ ທີ່ເມືອງຊຽງຄໍ້ແຂວງຫົວພັນ.
ຈຳເລີຍໄດ້ໃຫ້ການຮັບສາລະພາບວ່າ ພາຍຫຼັງຜູ້ກ່ຽວໄດ້ໄປຈຳວັດຢູ່ແຫ່ງດັ່ງກ່າວ ກໍໄດ້ມີພຶດຕິກຳທີ່ຜິດຕໍ່ວິໄນສົງ ແລະລະບຽບກົດໝາຍບ້ານເມືອງ ເຊິ່ງຜູ້ກ່ຽວໄດ້ມີການພົວພັນກັບສີກາ (ຍິງສາວ) ແລະພາຍິງສາວມານອນຢູ່ວັດນຳຫຼາຍຄັ້ງ ແລະກ່ອນຈະຖືກຈັບກຸມແມ່ນໄດ້ລັກເອົາພະພຸດທະຮູບນ້ອຍ ຈຳນວນ 10 ອົງຈາກວັດໄປຂາຍໃຫ້ທ້າວຕວນ ຄົນຫວຽດນາມ ຈາກນັ້ນກໍຖືກເຈົ້າໜ້າທີ່ຈັບກຸມມາດຳເນີນຄະດີ.
ຮູບປະກອບຈາກອິນເຕີເນັດ ບໍ່ກ່ຽວກັບຂ່າວແຕ່ຢ່າງໃດເລີຍ