ກະຊວງສຶກສາກຳປູເຈຍອະນຸມັດໃຫ້ນັກຮຽນຊັ້ນ ມ6 ແລະ ມ3 ທົ່ວປະເທດ ສຳເລັດການສອບເສັງລະດັບຊາດ ໂດຍບໍ່ຈຳ ເປັນຕ້ອງເຂົ້າຫ້ອງສອບເສັງ ເນື່ອງຈາກຜົນກະທົບຂອງໂຄວິດ-19.
ສຳນັກຂ່າວຕ່າງປະເທດ ລາຍງານວ່າ ນາຍົກລັດຖະມົນຕີ ຮຸນເຊນ ໄດ້ອອກຄຳສັ່ງໃຫ້ກະຊວງສຶກສາ, ຊາວໜຸ່ມ ແລະ ກິລາ ກຳປູເຈຍ ອະນຸມັດໃຫ້ນັກຮຽນຊັ້ນມັດທະຍົມສຶກສາປີທີ 6 ທົ່ວປະເທດ ເຊິ່ງມີກຳນົດທີ່ຈະສອບເສັງລະດັບຊາດໃນວັນທີ 11 ມັງກອນ 2021 ໃຫ້ຜ່ານອັດຕະໂນມັດໂດຍບໍ່ຕ້ອງເຂົ້າສອບເສັງ ເພື່ອປ້ອງກັນການແຜ່ລະບາດຂອງໂຄວິດ-19 ແລະ ເພື່ອບໍ່ໃຫ້ນັກຮຽນກັງວົນກ່ຽວກັບຄວາມສ່ຽງຕໍ່ການຕິດເຊື້ອຈາກການສອບເສັງ.
ລັດຖະມົນຕີກະຊວງສຶກສາກຳປູເຈຍ ທ່ານ ຮາງ ຊວນ ນະຣົນ ໄດ້ກ່າວວ່າ ລັດຖະບານຍັງໄດ້ອະນຸມັດໃຫ້ນັກຮຽນຊັ້ນ ມ3 ທີ່ມີກຳນົດວັນສອບເສັງລະດັບຊາດເມື່ອວັນທີ 30 ພະຈິກ 2020 ທີ່ຜ່ານມາ ສອບເສັງຜ່ານທຸກຄົນແບບອັດຕະໂນມັດເຊັ່ນດຽວກັນ ເຫດຜົນກໍ່ຍ້ອນການລະບາດຂອງໂຄວິດ-19 ເຮັດໃຫ້ໂຮງຮຽນຫຼາຍແຫ່ງບໍ່ສາມາດດຳເນີນການຮຽນ-ການສອນໄດ້ຄືກັນ.
ອີງຕາມການຣາຍງານຂອງກະຊວງສຶກສາຂອງກຳປູເຈຍໃນປີນີ້, ມີນັກຮຽນລະດັບມ6 ຈຳນວນ 121,108 ຄົນທີ່ຈະຕ້ອງໄດ້ສອບເສັງ, ໃນຂະນະທີ່ຊັ້ນມ3 ໄດ້ສອບເສັງທັງໝົດ 158,717 ຄົນ.
ຮຽບຮຽງຂ່າວ: ພູດສະດີ