ສຳນັກຂ່າວສານປະເທດລາວ ລາຍງານ ໃນວັນທີ 6 ຕຸລາ 2020 ທີ່ ວັດວິຊຸນ ນະຄອນຫຼວງພະບາງ, ໄດ້ມີພິທີມອບ-ຮັບ ໂຄງການບູລະນະປະຕິສັງຂອນວັດວິຊຸນ ພາຍຫຼັງສຳເລັດໃຫ້ແກ່ລັດຖະບານ ແລະ ປະຊາຊົນຫຼວງພະບາງ, ເຊິ່ງໄດ້ຮັບການບູລະນະ ໂດຍທຶນຂອງລັດຖະບານສະຫະລັດອາເມລິກາ ພາຍໃຕ້ກອງທຶນທ່ານທູດ ເພື່ອການອະນຸລັກວັດທະນະທໍາ (AFCP) ລວມເປັນມູນຄ່າ 347.000 ໂດລາສະຫະລັດ. ຕາງໜ້າມອບໂດຍ ທ່ານ ປີເຕີ ເຮມ໋ອນ ເອກອັກຄະລັດຖະທູດ ສະຫະລັດອາເມລິກາ ປະຈຳ ສປປ ລາວ ແລະ ຕາງໜ້າຮັບໂດຍ ທ່ານ ວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ.

ວັດວິຊຸນ ເປັນສະຖານທີ່ອັນສໍາຄັນທາງດ້ານປະຫວັດສາດຂອງຊາດລາວ ແລະ ໄດ້ສ້າງຂຶ້ນໃນສັດຕະວັດທີ 16 ໃນຍຸກພະເຈົ້າ ວິຊຸນນະລາດ, ເຊິ່ງເປັນໜຶ່ງໃນວັດທີ່ເກົ່າແກ່ທີ່ສຸດ ຢູ່ໃນຫລວງພະບາງ ແລະ ເປັນຈຸດສູນກາງແຫ່ງການຮຽນຮູ້ທາງດ້ານພຸດທະຊາດສະໜາ ແລະ ເປັນບ່ອນສຳລັບສັກກະລະບູຊາ ຫລາຍກວ່າ 500 ປີ.

ທ່ານເອກອັກຄະລັດຖະທູດ ເຮມ໋ອນ ກ່າວວ່າ: ນີ້ຖືເປັນກຽດຫຼາຍທີ່ພວກເຮົາໄດ້ສົ່ງເສີມ ໃນການບູລະນະ ແລະ ປົກປັກຮັກສາ ໜຶ່ງໃນສະຖານທີ່ອັນສໍາຄັນ ທາງດ້ານປະຫວັດສາດ ໃນທົ່ວສປປ ລາວ. ການຮ່ວມມືລະຫວ່າງ ສະຫະລັດອາເມລິກາ ກັບນະຄອນຫຼວງພະບາງ ໃນການບູລະນະວັດວິຊຸນ ຖືເປັນເຄື່ອງໝາຍແຫ່ງສາຍພົວພັນລະຫວ່າງສອງຊາດ ແລະ ຄວາມໝາຍໝັ້ນໃນການຊ່ວຍເຫຼືອປະຊາຊົນລາວ ໃນການປົກປັກຮັກສາຮີດຄອງອັນລໍ້າຄ່າ.

ໃນໄລຍະຜ່ານມາ, ລັດຖະບານສະຫະລັດອາເມລິກາ ໄດ້ປະກອບສ່ວນຫຼາຍລ້ານໂດລາ ເພື່ອເປັນການປົກປັກຮັກສາມໍລະດົກ ທາງດ້ານວັດທະນະທໍາ ໃນສປປ ລາວ ໂດຍການນຳໃຊ້ກອງທຶນທ່ານທູດ ເພື່ອການອະນຸລັກວັດທະນະທໍາ, ເຊິ່ງທຶນດັ່ງກ່າວ ໄດ້ໃຫ້ການສະໜັບສະໜູນລວມທັງໝົດ 20 ໂຄງການ ໂດຍສະເພາະການປະຕິສັງຂອນວັດວາອາຮາມອັນສັກສິດ, ການປົກປັກຮັກສາມໍລະດົກ ແລະ ວັດຖຸບູຮານ, ພ້ອມທັງການບັນທຶກວັດ ທະນະທຳຮີດຄອງປະເພນີ ລວມໄປເຖິງການປົກປັກຮັກສາຫໍສະມຸດ.

ຮຽບຮຽງຂ່າວ: ພຸດສະດີ