ເວັບໄຊ sanook ລາຍງານວ່າ ທ່ານ ວັງເຫວິນປິນ ໂຄສົກກະຊວງການຕ່າງປະເທດຈີນ ເປີດເຜີຍວ່າ ຈີນຈະແບ່ງປັນວັກຊີນປ້ອງກັນໂຄວິດ-19 ໃຫ້ທົ່ວໂລກໃນລາຄາທີ່ຍຸດຕິທຳ ແລະ ສົມເຫດສົມຜົນ.
ທ່ານ ວັງ ໄດ້ກ່າວຖະແຫຼງວ່າ “ວັກຊີນຂອງຫຼາຍປະເທດຍັງຢູ່ໃນການພັດທະນາ ຈິ່ງຍັງບໍ່ແນ່ນອນວ່າພວກເຂົາຈະກຳນົດລາຄາແນວໃດ ແຕ່ມີສິ່ງໜຶ່ງທີ່ຊັດເຈນສຳລັບຈີນ ຄືເຮົາຈະສົ່ງມອບວັກຊີນໃຫ້ນານາປະເທດໃນຖານະສິນຄ້າສາທາລະນະລະດັບໂລກ ດ້ວຍລາຄາທີ່ຍຸດຕິທຳ ແລະ ສົມເຫດສົມຜົນ”.
ທັງນີ້, ທ່ານ ວັງ ຍັງລະບຸຕື່ມອີກວ່າຈີນກຳລັງເລັ່ງພັດທະນາວັກຊີນປ້ອງກັນໂຄວິດ-19 ແລະ ຈະແບ່ງປັນໃຫ້ເປັນສິນຄ້າສາທາລະນະປະໂຫຍດໃນລະດັບໂລກເມື່ອວັກຊີນພ້ອມໃຊ້ງານ ພ້ອມກ່າວເສີມອີກວ່າຈີນຈະສົ່ງມອບວັກຊີນໃຫ້ກັບປະເທດທີ່ກຳລັງພັດທະນາກ່່ອນ ຜ່ານວິທີການທີ່ຫຼາກຫຼາຍ ເຊິ່ງລວມເຖິງການບໍລິຈາກ ແລະ ການສະໜັບສະໜູນໂດຍບໍ່ຄິດຄ່າໃຊ້ຈ່າຍ.
ຮຽບຮຽງຂ່າວ: ພຸດສະດີ