ປະທານາທິບໍດີ ວາລາດີເມຍ ປູຕິນ ຢືນຢັນໃຫ້ການສະໜັບສະໜຸນຕໍ່ອົງການອານາໄມໂລກ ລວມເຖິງການປະຕິຮູບໜ່ວຍງານ ແລະ ຄວາມຮ່ວມມືດ້ານວັກຊີນປ້ອງກັນໂຄວິດ-19 ຂະນະດຽວກັນ ຜູ້ນຳຣັດເຊຍຮຽກຮ້ອງການຢຸດຕິ “ມາດຕະການຄວໍ້າບາດຝ່າຍດຽວ”.
ເວັບໄຊຂ່າວ dailynews ລາຍງານເມື່ອວັນທີ 22 ກັນຍາ ວ່າ ສະພາແຫ່ງສະຫະປະຊາຊາດ (UNGA) ເຜີຍແຜ່ຄລິບບັນທຶກການກ່າວຖະແຫຼງການຂອງປະທານາທິບໍດີ ວາລາດິເມຍ ປູຕິນ ຜູ້ນຳຣັດເຊຍ ເນື່ອງໃນວາລະການປະຊຸມສະໄໝສາມັນຄັ້ງທີ 75 ມີໃຈຄວາມຕອນໜຶ່ງກ່ຽວກັບວິກິດໂຣກລະບາດໂຄວິດ-19 ວ່າ ເປັນໄພຄຸກຄາມທາງສາທາລະນະສຸກທີ່ບໍ່ມີຂອບເຂດ ຄວາມເປັນເອກະພາບ ແລະ ການຍົກລະດັບຄວາມຮ່ວມມືລະຫວ່າງນານາປະເທດ “ໂດຍບໍ່ຄວນມີກຳແພງ”.
ທັງນີ້, ຜູ້ນຳຣັດເຊຍກ່າວວ່າລັດຖະບານຣັດເຊຍໃຫ້ຄວາມນັບຖືຕໍ່ບົດບາດຂອງອົງການອານາໄມໂລກ (WHO) ໃນການເປັນສູນກາງປະສານງານດ້ານສາທາລະນະສຸກລະຫວ່າງປະເທດ ແຕ່ທ່າມກາງສະ ພາບການຂອງສະຖານະການໂລກ ເຊິ່ງປ່ຽນແປງຕາມຍຸກສະໄໝ ການປະຕິຮູບອົງກອນຈຶ່ງມີຄວາມສຳຄັນເຊັ່ນກັນ.
ຂະນະດຽວກັນ, ຣັດເຊຍມຸ່ງໝັ້ນໃນການມີສ່ວນຮ່ວມກັບທຸກພາກສ່ວນ ເພື່ອສົ່ງເສີມມາດຕະການຕອບສະໜອງທີ່ມີປະສິດທິພາບຕໍ່ໂຣກໂຄວິດ-19 ໂດຍຍິນດີ ແລະ ເປີດກ້ວາງການເປັນຫຸ້ນສ່ວນກັບທຸກປະເທດຕໍ່ໂຄງການ “ສະປຸກນິກ ໄຟ” ທີ່ຖືເປັນວັກຊີນຕົວທຳອິດຂອງໂລກ ເຊິ່ງສາມາດຕ້ານທານກັບເຊື້ອໄວຣັດໂຄໂຣນາສາຍພັນໃໝ່ ວັກຊີນນີ້ພັດທະນາໂດຍສຸນວິໄຈກາມາເລຍາ ສຸນລວມຜູ້ຊ່ຽວຊານດ້ານລະບາດວິທະຍາ ແລະ ຈຸລິນຊີຣັດເຊຍ.
ນອກຈາກນີ້, ປູຕິນຍັງກ່າວເຖິງກຳແພງການຄ້າ ມາດຕະການຈຳກັດຕ່າງໆນານາ ແລະ ມາດຕະການຄວໍ້າບາດຝ່າຍດຽວ ເຊິ່ງເກີດຂື້ນຕໍ່ເນື່ອງ ເຖິງທຸກຝ່າຍຈະຮູ້ດີວ່າເປັນນະໂຍບາຍທີ່ຜິດກົດໝາຍ ຫາກບໍ່ມີອຸປະສັກດັ່ງກ່າວ ໂລກທີ່ກຳລັງປະເຊີນໜ້າກັບໂຄວິດ-19 ຈະກັບມາຟື້ນຕົວ ແລະ ເດີນໜ້າຕໍ່ໄປໄດ້ໄວກວ່າທີ່ເປັນຢູ່.
ຮຽບຮຽງຂ່າວ: ພຸດສະດີ