ເມື່ອວັນທີ 22 ກັນຍາ 2020 ສື່ຂ່າວຫວຽດນາມ ລາຍງານວ່າ ເຈົ້າໜ້າທີ່ຕຳຫຼວດໄດ້ກວດພົບຖົງຢາງອານາໄມທີ່ໃຊ້ແລ້ວຈຳນວນຫຼາຍ ຖືກນຳໄປຣີໄຊເຄຼີ ແລະ ເກັບໄວ້ເພື່ອຈຳໜ່າຍ ຫຼັງເຂົ້າກວດຄົ້ນອາພາດເມັ້ນແຫ່ງໜຶ່ງ ເມື່ອວັນເສົາທີ່ຜ່ານມາ.
ຈາກການກວດສອບພົບວ່າ ຖົງຢາງອານາໄມທີ່ໃຊ້ແລ້ວເກືອບ 324,000 ຖົງ ຫຼື ປະມານ 360 ກິໂລ ກຣາມ ໄດ້ຖືກຣີໄຊເຄຼີໃນໂຮງງານແຫ່ງໜຶ່ງ ເພື່ອນຳໄປຈຳໜ່າຍທີ່ທ້ອງຕະຫຼາດ. ເຈົ້າໜ້າທີ່ຈຶ່ງໄດ້ຢຶດຖົງຢາງທັງໝົດໃນໂຮງງານດັ່ງກ່າວ ເຊິ່ງຕັ້ງຢູ່ທີ່ແຂວງບິນເຊືອງ ທາງໃຕ້ຂອງຫວຽດນາມ.
ເມື່ອກວດສອບຖານການຜະລິດຕາມຫຼັກກົດໝາຍພົບວ່າ ຖົງຢາງອານາໄມໃຊ້ແລ້ວທັງໝົດນີ້ ບໍ່ໄດ້ບັນຈຸຫີບຫໍ່ ແລະ ບໍ່ບັນຈຸສະຫຼາກ.
ເຈົ້າຂອງໂຮງງານຍອມຮັບວ່າ ນາງໄດ້ຮັບຖົງຢາງອານາໄມທີ່ໃຊ້ແລ້ວມາຈາກບຸກຄົນບໍ່ຮູ້ຊື່ ຈາກນັ້ນຈະນຳຖົງຢາງໄປຜ່ານຂະບວນການຊັກລ້າງ ຕາກໃຫ້ແຫ້ງ ແລະ ຂຶ້ນຮູບດ້ວຍອຸປະກອນທີ່ຢູ່ໃນສະພາບບໍ່ຖືກສຸຂະອານາໄມກ່ອນຈະໄປຈຳໜ່າຍ.
ຮຽບຮຽງໂດຍ: ພຸດສະດີ