ເມື່ອວັນທີ 18 ກັນຍາ 2020 ເວັບໄຊ dailymail ລາຍງານວ່າ ເຈົ້າໜ້າທີ່ສາທາລະນະສຸກໃນເມືອງຫຼານໂຈວ ຢືນຢັນມີຜູ້ຕິດເຊື້ອບຣູເຊລລາ ໃນເມືອງຫຼານໂຈວ ປະມານ 3,245 ຄົນ ຈາກຈຳນວນປະຊາ ກອນທັງໝົດໃນເມືອງ 2.9 ລ້ານຄົນ ໂດຍເຈົ້າໜ້າທີ່ສາທາລະນະສຸກລາຍງານວ່າ ພົບອີກ 1,401 ຄົນມີຜົນກວດເບື້ອງຕົ້ນເປັນບວກ ແລະ ຍັງບໍ່ພົບຜູ້ເສຍຊີວິດ.
ຕາມການລາຍງານຂອງສຳນັກຂ່າວຊິນຫົວ ລະບຸວ່າ ແກ໊ສທີ່ປົນເປື້ອນເຊື້ອແບດທີເຣຍບຣູເຊລລາ ທີ່ຫຼຸດອອກມາຈາກໂຮງງານຜະລິດວັກຊີນ ສຳລັບສັດແຫ່ງນີ້ ເປັນລະອອງຝອຍທີ່ຖືກລົມພັດໄປຈົນເຖິງສະຖາບັນວິໄຈທາງສັດຫຼານໂຈວ ຈົນເຮັດໃຫ້ມີຜູ້ຕິດເຊື້ອບຣູເຊລລາເກືອບ 200 ຄົນ ໃນເດືອນທັນວາ 2019 ແລະ ຕໍ່ມາເຈົ້າໜ້າທີ່ໄດ້ມີການກວດເຊື້ອໃຫ້ແກ່ນັກສຶກສາ, ອາຈານ ແລະ ບຸກຄະລາກອນໃນສະຖາບັນວິໄຈແຫ່ງນີ້.
ຄະນະກຳມະທິການສູນສຸຂະພາບແຫ່ງເມືອງຫຼານໂຈວ ຖະແຫຼງຂ່າວເມື່ອວັນທີ 18 ກັນຍາ ວ່າ ສ່ວນ ໃຫຍ່ແລ້ວ ສັດປະເພດ ແກະ, ງົວ ແລະ ໝູ ມີສ່ວນກ່ຽວຂ້ອງກັບການແຜ່ລະບາດຂອງເຊື້ອແບດທີເຣຍບຣູເຊລລາ ທີ່ກໍ່ໃຫ້ເກີດໂຣກບຣູເຊລໂລຊິສ ເຊິ່ງຈະເຮັດໃຫ້ເກີດມີອາການໄຂ້ເປັນໄລຍະຍາວນານ ເປັນໆ ຫາຍໆ ບໍ່ແນ່ນອນ, ປວດຫົວ, ອ່ອນເພຍ, ເຫື່ອອອກຫຼາຍ, ໜາວສັ່ນ, ປວດຕາມຮ່າງກາຍ ແລະ ອື່ນໆ.
ທາງໂຮງງານຜະລິດວັກຊີນແຫ່ງນີ້ໄດ້ອອກມາຂໍໂທດປະຊາຊົນໃນເມືອງຫຼານໂຈວ ເມື່ອຕົ້ນປີທີ່ຜ່ານມາ ແລະ ທາງລັດຖະບານໄດ້ສັ່ງຖອນໃບອະນຸຍາດໂຮງງານແຫ່ງນີ້ໃນການຜະລິດວັກຊີນປ້ອງກັນໂຣກບຣູເຊລໂລຊິລແລ້ວ ນອກນັ້ນ, ທາງໂຮງງານໄດ້ເລີ່ມຈ່າຍຄ່າຊົດເຊີຍໃຫ້ແກ່ຜູ້ປ່ວຍທີ່ຕິດເຊື້ອ.
ຮຽບຮຽງຂ່າວ: ພຸດສະດີ