ເວັບໄຊ bangkokbiznews ລາຍງານວ່າ ລັດຖະບານ ສ.ອາເມລິກາ ສະແດງຄວາມບໍ່ພໍໃຈ ຫຼັງຈາກທີ່ອົງການການຄ້າໂລກ (WTO) ມີຄຳຕັດສິນໃນວັນນີ້ວ່າ ການທີ່ ສ.ອາເມລິກາ ຮຽກເກັບພາສີເພີ່ມເຕີມຕໍ່ສິນຄ້ານຳເຂົ້າຈາກຈີນມູນກວ່າ 2 ແສນລ້ານໂດລາໃນປີ 2018 ຖືເປັນການລະເມີດກົດລະບຽບການຄ້າລະຫວ່າງປະເທດ.
ທ່ານ ໂຣເບີດ ໄລໄຮເຊີ ຕົວແທນການຄ້າສະຫະລັດອາເມລິກາ (USTR) ອອກຖະແຫຼງການລະບຸວ່າ “ຄຳຕັດສິນດັ່ງກ່າວສະແດງໃຫ້ເຫັນວ່າ WTO ບໍ່ໄດ້ຊ່ວຍຮັກສາການດຳເນີນການທີ່ບໍ່ຖືກຕ້ອງຂອງຈີນ ໂດຍ ສ.ອາເມລິກາ ຄວນໄດ້ຮັບໂອກາດໃນການປົກປ້ອງຕົວເອງຈາກການດຳເນີນການທາງການຄ້າທີ່ບໍ່ເປັນທຳ ແລະ ລັດຖະບານຂອງປະທານາທິບໍດີ ໂດນັລ ທຣໍ້າ ຈະບໍ່ປ່ອຍໃຫ້ຈີນອາໄສ WTO ເພື່ອມາເອົາລັດເອົາປຽບແຮງງານ ພາກທຸລະກິດ ແລະ ຊາວໄຮ່ຂອງອາເມລິກາ”.
ຄະນະກຳມະການສອບສວນຂອງ WTO ມີການຕັດສິນໃຈວ່າ ການທີ່ ສ.ອາເມລິກາ ຮຽກເກັບພາສີຕໍ່ສິນຄ້ານຳເຂົ້າຈາກຈີນຖືເປັນການລະເມີດກົດລະບຽບທາງການຄ້າ ເນື່ອງຈາກ ສ.ອາເມລິກາ ຮຽກເກັບພາສີຈາກສິນຄ້ານຳເຂົ້າຈາກຈີນເທົ່ານັ້ນ ແລະ ອາເມລິກາບໍ່ສາມາດຊີ້ແຈງໃຫ້ເຫັນວ່າສິນຄ້າຈີນທີ່ຖືກຮຽກເກັບພາສີດັ່ງກ່າວ ໄດ້ຮັບປະໂຫຍດຈາກການດຳເນີນການທາງການຄ້າທີ່ບໍ່ເປັນທຳຂອງຈີນ.
ກ່ອນໜ້ານີ້, ອາເມລິກາຮຽກເກັບພາສີເພີ່ມເຕີມຈາກສິນຄ້ານຳເຂົ້າຈາກຈີນ ໂດຍອ້າງວ່າຈີນໄດ້ດຳເນີນທາງການຄ້າທີ່ກະທົບຕໍ່ຜົນປະໂຫຍດຂອງ ອາເມລິກາ ເຊິ່ງລວມເຖິງການລັກຊັບສິນທາງປັນຍາ ແລະ ການຖ່າຍໂອນເທັກໂນໂລຢີ.
ຮຽບຮຽງຂ່າວ: ພຸດສະດີ