ເວັບໄຊຂ່າວ dailynews ລາຍງານເມື່ອວັນທີ 8 ກັນຍາ 2020 ວ່າ ບໍລິສັດດ້ານຊີວະວິທະຍາລາຍໃຫຍ່ 2 ແຫ່ງຂອງຈີນ ຄື: ຊິໂນແວດ ໄບໂອເທດ ແລະ ຊິໂນຟຣາມ ນຳຕົວຢ່າງວັກຊີນປ້ອງກັນເຊື້ອໄວຣັດໂຄວິດ-19 ເຊິ່ງຄິດຄົ້ນ ແລະ ພັດທະນາຕົວເອງທຸກຂັ້ນຕອນພາຍໃນປະເທດອອກມາຈັດສະແດງເປັນຄັ້ງທຳອິດທີ່ງານສະແດງສິນຄ້າ ແລະ ບໍລິການນານາຊາດ ໃນນະຄອນປັກກິ່ງ.
ເຖິງຮູບລັກສະນະພາຍນອກຂອງວັກຊີນບໍ່ຕ່າງຈາກວັກຊີນທົ່ວໄປ ຄືເປັນຂອງເຫຼວໃສບັນຈຸຢູ່ພາຍໃນຫຼອດ ແລະ ວັກຊີນຍັງບໍ່ໄດ້ຮັບອະນຸຍາດໃຫ້ໃຊ້ງານໄດ້ແທ້ເປັນວົງກວ້າງ ເນື່ອງຈາກຍັງຢູ່ໃນຂັ້ນຕອນຂອງການທົດສອບໄລຍະທີສາມ ເຖິງແນວໃດກໍ່ຕາມ ການນຳຕົວຢ່າງທຳອິດຂອງວັກຊີນອອກມາຈັດສະແດງໃນຄັ້ງນີ້ໄດ້ຮັບຄວາມສົນໃຈຈາກປະຊາຊົນຈຳນວນຫຼາຍ.
ໃນຂະນະທີ່ຕົວແທນຂອງຊິໂນແວດ ໄບໂອເທດ ແລະ ຊິໂນຟຣາມ ສະແດງຄວາມຫວັງໄປໃນທາງດຽວກັນວ່າຈະໄດ້ຮັບອະນຸຍາດຢ່າງເປັນທາງການພາຍໃນທ້າຍປີນີ້ ໂດຍຊິໂນແວດ ໄບໂອເທດ ກໍ່ສ້າງໂຮງງານເພື່ອຜະລິດວັກຊີນປ້ອງກັນໂຄວິດ-19 ສຳເລັດຮຽບຮ້ອຍແລ້ວ ເບື້ອງຕົ້ນຕັ້ງເປົ້າຜະລິດໃຫ້ໄດ້ປີລະປະມານ 300 ລ້ານໂດສ ສ່ວນຕົວແທນຂອງຊິໂນຟຣາມຢືນຢັນວ່າວັກຊີນທີ່ຜະລິດອອກມາມີລາຄາບໍ່ແພງ ໂດຍ 2 ໂດສບໍ່ເກີນ 1,000 ຢວນ.
ໂຄງການພັດທະນາວັກຊີນໂຄວິດ-19 ຂອງຊິໂນແວດ ໄບໂອເທດ ແລະ ຊິໂນຟຣາມ ເປັນໜຶ່ງໃນວັກຊີນປະມານ 10 ຂະໜາດທີ່ຫຼາຍປະເທດກຳລັງເລັ່ງພັດທະນາ ແລະ ຢູ່ລະຫວ່າງການທົດສອບທາງຄລີນິກຂັ້ນທີ 3 ເຊິ່ງໃນທາງທິດສະດີຄືຂັ້ນສຸດທ້າຍກ່ອນເຂົ້າສູ່ຂະບວນການຮັບຮອງທາງກົດໝາຍ.
ຮຽບຮຽງຂ່າວ: ພຸດສະດີ