ໜັງສືພິມວຽງຈັນໃໝ່ ລາຍງາຍວ່າ ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ (ຍທຂ ນວ) ຮ່ວມກັບຄະນະຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ນວ ລົງຮື້ຖອນປ້າຍໂຄສະນາທີ່ຕັ້ງຜິດລະບຽບເຂດສະຫງວນທາງ ຢູ່ຖະໜົນ 450 ປີ ໃນວັນທີ 4 ກັນຍາ 2020.
ທ່ານ ສຸລິວັນ ພົມມະຫາໄຊ ຫົວຫນ້າພະແນກ ຍທຂ ນະຄອນຫຼວງວຽງຈັນ ກ່າວວ່າ: ເພື່ອຈັດຕັ້ງຜັນຂະຫຍາຍຂໍ້ຕົກລົງຂອງທ່ານ ເຈົ້າຄອງ ນວ ວ່າດ້ວຍການຈັດສັນຄວາມບໍ່ເປັນລະບຽບຮຽບຮ້ອຍໃນຕົວເມືອງ ແລະ ຊານເມືອງ ເພື່ອເນັ້ນໃສ່ຕົວເມືອງໃນຍຸກ AEC ໃຫ້ມີຄວາມສະອາດ ຈົບງາມ ມີສີຂຽວ ແລະ ມີຄວາມສະດວກສະບາຍ ດ້ານສາທາລະນຸປະໂພກຕ່າງໆ ໃຫ້ສົມກັບເມືອງຫຼວງຂອງປະເທດລາວ ເປັນການສ້າງຂະບວນການຄໍານັບຮັບຕ້ອນວັນສໍາຄັນຕ່າງໆຂອງຊາດ- ຂອງພັກ ໂດຍສະເພາະ ຄໍານັບຮັບຕ້ອນກອງປະຊຸມໃຫຍ່ຄັ້ງທີ VII ຂອງອົງຄະນະພັກ ນວ ທີ່ຈະໄຂຂຶ້ນໃນມໍ່ໆນີ້ ໂດຍໄດ້ເລັ່ງໃສ່ບັນດາເສັ້ນທາງສາຍຫຼັກໃນແຜນ 21 ເສັ້ນຢູ່ 6 ຕົວເມືອງໃນຂອງ ນວ ໂດຍສະເພາະຖະໜົນ ໄກສອນ ພົມວິຫານ ເສັ້ນທາງT2 ແລະ ທາງສາຍຫຼັກອື່ນໆທີ່ພວກເຮົາໄດ້ຈັດສັນ.
ມາຮອດປັດຈຸບັນ ການຈັດຕັ້ງປະຕິບັດວຽກງານດັ່ງກ່າວໄດ້ເລີ່ມສືບຕໍ່ຂະຫຍາຍສູ່ແຕ່ລະເສັ້ນທາງສາຍຫຼັກຂອງແຕ່ລະເມືອງ ທີ່ຍັງບໍ່ທັນໄດ້ຈັດຕັ້ງປະຕິບັດ ເຊິ່ງຈັດຕັ້ງປະຕິບັດຢູ່ຖະໜົນເສັ້ນທາງ 450 ປີ ລະຫວ່າງສາມແຍກຊາຍແດນບ້ານໂຊກໃຫຍ່ ຫາເຂດສີ່ແຍກໄພອຳນາດດົງໂດກ ໃນນີ້, ສະເພາະໃນຖະໜົນ 450 ປີ ເຂດເມືອງໄຊເຊດຖາມີ 31 ກໍລະນີ ເມືອງໄຊທານີ ມີປ້າຍກວມເອົາເຂດສະຫງວນທາງ ແລະ ບໍ່ມີອະນຸຍາດ 36 ປ້າຍ ຮົ້ວ-ກຳແພງກວມເຂດສະຫງວນທາງ 3 ກໍລະນີ ເທີບ 15 ກໍລະນີ ວາງເຄື່ອງ 3 ກໍລະນີ ແລະ ສິ່ງປຸກສ້າງອື່ນໆຈໍານວນໜຶ່ງ.
ກ່ອນຈະລົງມາຈັດຕັ້ງປະຕິບັດການຮື້ຖອນ ໄດ້ມີການກ່າວເຕືອນ ເຮັດບົດບັນທຶກ ແລະ ແຈ້ງໃຫ້ພວກກ່ຽວຮັບຊາບພາຍໃນ 15 ວັນ ສະເພາະຢູ່ຖະໜົນ 450 ປີນີ້ ໄດ້ແຈ້ງມາ 2 ກວ່າເດືອນແລ້ວ ແຕ່ເຂົາ ເຈົ້າກໍຍັງບໍ່ໄດ້ຮື້ຖອນອອກ ດັ່ງນັ້ນພພາກສ່ວນກ່ຽວຂ້ອງຈຶ່ງໄດ້ລົງມາປະຕິບັດຕາມລະບຽບຢ່າງເຂັ້ມງວດ ພ້ອມທັງສືບຕໍ່ແຈ້ງໄປຍັງເຈົ້າຂອງປ້າຍທີ່ຍັງບໍ່ທັນໄດ້ຈັດຕັ້ງປະຕິບັດໃຫ້ຮັບຮູ້ ແລະ ເຂົ້າໃຈເຖິງລະບຽບການຕ່າງໆຂອງລັດ ຕ້ອງເຂົ້າຕິດຕັ້ງປ້າຍໂຄສະນາ ຫຼື ສິ່ງປຸກສ້າງອື່ນໆຕາມກົດໝາຍຜັງເມືອງ ແລະ ກົດໝາຍແຫ່ງຊາດ ໃຫ້ຫ່າງອອກໄປຈາກເຂດສະຫງວນທັງສອງຝາກ 25 ແມັດ ເພື່ອບໍ່ໃຫ້ບົດບັງສະພາບການສັນຈອນຂອງເສັ້ນທາງ ແລະ ອື່ນໆ.
ສໍາລັບແຜນການໃນຕໍ່ໜ້າ ພາຍຫຼັງທີ່ເຮົາສໍາເລັດຢູ່ເຂດເສັ້ນທາງ 450 ປີ ນີ້ສໍາເລັດ ຈະສືບຕໍ່ໄປຈັດຕັ້ງປະຕິບັດຢູ່ຖະໜົນທ່່າເດື່ອ ເມືອງຫາດຊາຍຟອງ ແລະ ຖະໜົນສາຍຫຼັກອື່ນໆ ໃນ ນວ ໃຫ້ສໍາເລັດຕາມເວລາທີ່ກຳນົດ.
ຮຽບຮຽງຂ່າວ: ພຸດສະດີ