ປກສ ນະຄອນຫຼວງວຽງຈັນ ລາຍງານວ່າ ເຈົ້າໜ້າທີ່ໜ່ວຍງານ ສະກັດກັ້ນ ແລະ ຕ້ານຢາເສບຕິດ ປກສ ເມືອງສີໂຄດຕະບອງ ນວ ໄດ້ໃຫ້ຮູ້ວ່າ: ທ້າວ ຕ້ອມ ອາຍຸ 29 ປີ ພັກອາໃສຢູ່ຫ້ອງເຊົ່າ ບ້ານວຽງຄໍາ ເມືອງສີໂຄດຕະບອງ ນະຄອນຫຼວງວຽງຈັນ ເປັນເປົ້າໝາຍຄ້າຂາຍຢາເສບຕິດ; ເຊິ່ງເຈົ້າໜ້າທີ່ສາມາດກັກຕົວໄດ້ ພ້ອມກັບຂອງກາງຢາບ້າຈໍານວນ 901 ເມັດ ໃນວັນທີ 14 ສິງຫາ 2020 ໃນຂະນະທີ່ຢືນລໍຖ້າໝູ່ມາຮັບ ເພື່ອຈະອອກໄປກິນເຂົ້າທ່ຽງ.
ຜ່ານການສອບປາກຄໍາເບື້ອງຕົ້ນ ທ້າວ ຕ້ອມ ຍອມຮັບສາລະພາບວ່າ: ຕົນເອງໄດ້ເລີ່ມພົວພັນຊື້-ຂາຍຢາເສບຕິດ ມາແຕ່ປີ 2007 ເຊິ່ງແມ່ນໄດ້ຊື້ນໍາຊາຍຄົນໜຶ່ງ, ບໍ່ຮູ້ບ້ານ, ເບື້ອງຕົ້ນແມ່ນຮູ້ຈັກກັນແບບໝູ່ຕໍ່ໝູ່. ຈາກນັ້ນ, ກໍໄດ້ພົວພັນຊື້-ຂາຍຢາເສບຕິດນໍາກັນຫຼາຍຄັ້ງ, ໂດຍຊື້ຄັ້ງລະ 200 ເມັດ ຈຸດນັດສົ່ງຢາກັນໃນແຕ່ລະຄັ້ງແມ່ນຢູ່ຕາມເສັ້ນທາງຕ່າງ. ຫຼັງຈາກໄດ້ຢາບ້າມາແລ້ວ ກໍ່ນໍາໄປຂາຍຕໍ່ໃຫ້ກັບໄວລຸ້ນຢູ່ພາຍໃນບ້ານ ແລະ ໃນຄັ້ງລ່າສຸດຄື: ວັນທີ 13 ສິງຫາ 2020 ເວລາປະມານ 19:00 ໂມງ ຕົນໄດ້ໂທສັ່ງຊື້ຢານໍາຊາຍຄົນດັ່ງກ່າວອີກ ຈໍານວນ 1000 ເມັດ ແລ້ວເອົາມາແບ່ງຂາຍໃຫ້ກັບພວກໄວລຸ້ນຄືເກົ່າ, ຕົກມາຮອດວັນທີ 14 ສິງຫາ 2020 ຕົນລໍກໍາລັງຢືນຖ້າໝູ່ມາຮັບ ເພື່ອໄປກິນເຂົ້າທ່ຽງ, ຈຶ່ງຖືກເຈົ້າ ໜ້າທີ່ເຂົ້າຈັບຕົວ ພ້ອມກັບຂອງກາງຢາບ້າຈໍານວນ 901 ເມັດ ທີ່ຊຸກເຊື່ອງໄວ້ໃນຖົງເສື້ອຂອງຜູ້ກ່ຽວ.
ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສີໂຄດຕະບອງ ນະຄອນຫຼວງວຽງຈັນ ໄດ້ໃຫ້ຮູ້ອີກວ່າ: ທ້າວ ຕ້ອມ ແມ່ນເຄີຍຖືກຈໍາຄຸກຢູ່ ປກສ ເມືອງໄຊທານີ ເປັນເວລາ 5 ປີ ໃນສະຖານຄ້າຂາຍຢາເສບຕິດ ແລະ ຫາກໍທີ່ພົ້ນໂທດອອກມາຕົ້ນປີ 2020.
ປັດຈຸບັນຄະດີລາຍນີ້, ແມ່ນຢູ່ໃນຂັ້ນຕອນຂອງການສືບສວນ-ສອບສວນ ເພື່ອຂະຫຍາຍຜົນຊອກຫາກຸ່ມແກ້ງທີ່ຮ່ວມຂະບວນການ ມາດຳເນີນຄະດີຕາມກົດໝາຍ.
ຮຽບຮຽງຂ່າວ: ພຸດສະດີ