ເວັບໄຊ posttoday ລາຍງານວ່າ ທ່ານ ຈັດ ເດຍ ໂຄສົກທຳນຽບຂາວເຜີຍວ່າ ອາເມລິກາຈະບໍ່ເຂົ້າຮ່ວມໂຄງການພັດທະນາ ແລະ ຈັດຫາວັກຊີນໂຄວິດ-19 ກັບນານາຊາດ ເນື່ອງຈາກເປັນໂຄງການຂອງອົງການອານາໄມໂລກ ທີ່ ທຣໍ້າ ກ່າວຫາວ່າບໍ່ສັດຊື່.
ທ່ານ ເດຍ ຍັງລະບຸອີກວ່າ ທຣໍ້າຈະທຸ່ມງົບປະມານບໍ່ອັ້ນເພື່ອສ້າງຄວາມໝັ້ນໃຈວ່າວັກຊີນໂຄວິດ-19 ຂອງ ອາເມລິກາຜ່ານມາດຕະຖານລະດັບສຸງຂອງສຳນັກງານຄະນະກຳມະທິການອາຫານ ແລະ ຢາ ດ້ານຄວາມປອດໄພ ແລະ ປະສິດທິພາບ.
ຂະນະນີ້ກວ່າ 170 ປະເທດກຳລັງຫາລືໃນການເຂົ້າຮ່ວມໂຄງການພັດທະນາ ແລະ ຈັດຫາວັກຊີນ Covax ເຊິ່ງນຳໂດຍອົງການອານາໄມໂລກ ເພື່ອຊ່ວຍໃຫ້ແຕ່ລະປະເທດເຂົ້າເຖິງວັກຊີນໂຄວິດ-19 ຢ່າງເທົ່າທຽມ ໂດຍຕັ້ງເປົ້າໝາຍວ່າຈະຊື້ວັກຊີນໃຫ້ໄດ້ຢ່າງໜ້ອຍ 2,000 ລ້ານໂດສພາຍໃນປີ 2021 ແລ້ວແຈກຢາຍໄປທົ່ວໂລກ ແຕ່ຈົນເຖິງຕອນນີ້ຍັງຈັດຫາໄດ້ພຽງ 300 ລ້ານໂດສເທົ່ານັ້ນ.
ການປະຕິເສດເຂົ້າຮ່ວມກັບ WHO ເກີດຂຶ້ນຫຼັງຈາກທຣໍ້າປະກາດຖອນຕົວຈາກ WHO ເມື່ອເດືອນກໍລະກົດທີ່ຜ່ານມາ ໂດຍອ້າງວ່າ WHO ຢູ່ພາຍໃຕ້ອິດທິພົນຂອງຈີນຫຼາຍຈົນເກີນໄປ.
ຮຽບຮຽງຂ່າວ: ພຸດສະດີ