ເວັບໄຊ posttoday ລາຍງານວ່າ ປະທານາທິບໍດີ ໂຣດຣິໂກ ດູເຕີເຕ ຂອງຟິລິບປິນ ກ່າວຫຼັງ ປະຊຸມຄະນະລັດຖະມົນຕີວ່າ ໄດ້ອອກຄຳສັ່ງອະນຸມັດໃຫ້ ທ່ານ ເຣຍ ລີໂອນາໂດ ເກີເຣໂຣ ຫົວໜ້າກົມພາສີ ວິສາມັນຄາດຕະກຳຜູ້ລັກລອບຂາຍຢາເສບຕິດເຂົ້າປະເທດໄດ້ທັນທີ ແລະ ກ່ອນໜ້ານີ້ຍັງອະນຸມັດໃຫ້ກົມພາສີຊື້ອາວຸດເພີ່ມຕາມຄຳຂໍຂອງຫົວໜ້າກົມອີກດ້ວຍ.
ຄຳກ່າວນີ້ຖືເປັນໜຶ່ງໃນການປະກາດເສິກທີ່ຊັດເຈນໄປເຖິງຜູ້ຄ້າຢາເສບຕິດນັບຕັ້ງແຕ່ດູເຕີເຕປະກາດສົງຄາມກັບຢາເສບຕິດແບບໜັກໜ່ວງເມື່ອ 4 ປີທີ່ຜ່ານມາ.
ປັດຈຸບັນ, ມີຜູ້ຕ້ອງສົງໃສກ່ຽວຂ້ອງກັບຢາເສບຕິດຖືກວິສາມັນຄາດຕະກຳໄປແລ້ວກວ່າ 5,700ຄົນ ເຮັດໃຫ້ກຸ່ມເຄື່ອນໄຫວເພື່ອສິດທິມະນຸດ ແລະ ລັດຖະບານຕະເວັນຕົກວິພາກວິຈານລັດຖະບານຟິລິບປິນຢ່າງໜັກ ລວມເຖິງມີການຮຽກຮ້ອງໃຫ້ສານອາຍາລະຫວ່າງປະເທດສອບສວນການວິສາມັນຄາດຕະກຳໃນສົງຄາມຢາເສບຕິດຂອງຟິລິບປິນ.
ຂະນະທີ່ທ່ານ ດູເຕີເຕ ປະຕິເສດຂໍ້ກ່າວຫາວິສາມັນຄາດຕະກຳມາໂດຍຕະຫຼອດ ໂດຍລະບຸວ່າຜຸ້ຖືກຫາທີ່ຖືກວິສາມັນຄາດຕະກຳນັ້ນສ່ວນໃຫຍ່ຕໍ່ສູ້ ຫຼື ຄຸກຄາມຊີວິດຂອງເຈົ້າໜ້າທີ່ໃນເວລາປະຕິບັດໜ້າທີ່.
ຮຽບຮຽງຂ່າວ: ພຸດສະດີ