ໜັງສືພິມວຽງຈັນທາມ ລາຍງານວ່າ ງານມະຫາກຳກິລາແຫ່ງຊາດ ຄັ້ງທີ 11 ຫຼື ຊຽງຂວາງ ເກມ ກຽມ ພ້ອມແລ້ວ 100% ໂດຍສະເພາະ ສະໜາມກີລາທີ່ຈະນຳໃຊ້ເຂົ້າໃນພິທີເປີດ-ປິດ ແລະ ສະຖານທີ່ພັກເຊົາຂອງຄະນະນຳ, ຄູຝຶກ ແລະ ນັກກິລາ ກໍ່ໄດ້ມີການປັບປຸງແກ້ໄຂຄືນໃໝ່ ສໍາເລັດໄປແລ້ວ 100%, ປະຈຸບັນ ຍັງລໍຖ້າທາງລັດຖະບານ ກໍຄື ກະຊວງສຶກສາທິການ ແລະ ກິລາ ອະນຸມັດເປີດການແຂ່ງຂັນຢ່າງເປັນທາງການ ໃນມື້ໃດເທົ່ານັ້ນ.
ໃນໂອກາດດັ່ງກ່າວ, ຫົວໜ້າພະແນກສຶກສາທິການ ແລະ ກີລາ ແຂວງຊຽງຂວາງ, ທ່ານ ບົວລີ ພັນນາວົງ ໄດ້ລາຍງານ ໃນໂອກາດເຂົ້າຮ່ວມກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວປະເທດ ປະຈຳສົກຮຽນ ປີ 2019-2020 ໃນລະຫວ່າງວັນທີ 27-28 ສິງຫາ 2020 ທີ່ນະຄອນຫຼວງວຽງຈັນ ວາ່: ສໍາລັບ ພິທີເປີດ-ປິດ ແລະ ປະດັບປະດາສະໜາມກິລາປະເພດຕ່າງໆ, ຕິດຕັ້ງລະບົບອິນເຕີເນັດ,ຈັດພິມໃບຍ້ອງຍໍ ແລະ ວິທີການມອບຫຼຽນແຕ່ລະປະເພດ ສຳເລັດ 100%, ຂຶ້ນທະບຽນອອກບັດໃຫ້ຄະນະຮັບ ຜິດຊອບຈັດງານ, ຄູຝຶກ, ນັກກິລາຂອງແຕ່ລະແຂວງ, ໄດ້ຈັດພິມບັດຄ້ອງຄໍສໍາເລັດໄປແລ້ວຈໍານວນ 2,534 ບັດ ພ້ອມທັງ ກຽມຫຼຽນລາງວັນ, ສັດນໍາໂຊກກະຕຸນນົກແອ່ນ ແລະ ອື່ນໆ.
ພ້ອມນັ້ນ, ດ້ານກຳມະການເຕັກນິກ-ຈັດການແຂ່ງຂັນ ແມ່ນໄດ້ສຳເລັດການຈັດຊື້ເຄື່ອງນຸ່ງນັກກິລາແຕ່ລະປະເພດ ແລະ ອຸປະກອນຕ່າງໆຮັບໃຊ້ໃນການແຂ່ງຂັນກິລາແຕ່ລະປະເພດ, ຈັດພິມປື້ມລະບຽບການແຂ່ງຂັນກິລາແຕ່ລະປະເພດ, ຈັດຊື້ລະບົບໄອທີແບບອອນລາຍ, ການຝຶກແອບ ນາງສາວມອບຫຼຽນ, ສໍາເລັດການກະກຽມດ້ານໂຮງແຮມ, ບ້ານພັກ, ຮ້ານອາຫານ ຮັບຕ້ອນແຂກ, ສຳເລັດການກໍານົດວິທີແຫ່ທວນໄຟ, ແຫ່ໄຫຫີນ, ວິທີຈູດທວນໄຟ; ການຝຶກແອບນັກສະແດງ, ການສວນສະໜາມ, ສຳເລັດການຈັດຊື້ເຄື່ອງໄຟແສງ-ສີ ແລະ ອຸປະກອນຕ່າງໆ ຮັບໃຊ້ການສະແດງ ແລະ ອື່ນໆ.
ຮຽບຮຽງຂ່າວ: ພຸດສະດີ