ສຳນັກຂ່າວສານປະເທດລາວ ລາຍງານວ່າ ບໍລິສັດ ອະສັງຫາລິມະຊັບ ຫວ່ານເຟີງ ຊຽງໄຮ້ ສປ ຈີນ ຈຳກັດ ເຊິ່ງເປັນຜູ້ພັດທະນາໂຄງການເຂດເສດຖະກິດພິເສດ ບຶງທາດຫຼວງ ມີແຜນຈະສ້າງຮູບປັ້ນພະພຸດທະຮູບໃຫຍ່, ເຊິ່ງມີຄວາມສູງປະມານ 100 ແມັດ ຢູ່ເຂດເສດຖະກິດພິເສດບຶງທາດຫຼວງ ທີ່ຕັ້ງຢູ່ຈຸດໃຈກາງນະຄອນຫຼວງວຽງຈັນ. ທັງນີ້, ກໍເພື່ອເປັນການດຶງດູງນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວສະຖານທີ່ດັ່ງກ່າວ ໃຫ້ນັບມື້ຫຼາຍຂຶ້ນ.
ອີງຕາມຂໍ້ມູນຈາກຜູ້ພັດທະນາໂຄງການລະບຸວ່າ: ຈຸດປະສົງໃນການສ້າງພະພຸດທະຮູບດັ່ງກ່າວ ກໍເນື່ອງຈາກວ່າ ພະພຸດທະຮູບເປັນທີ່ນັບຖື/ເຊື່ອຖື ຂອງຊາວສາສະໜາພຸດທັງຫຼາຍ ນັບທັງ ສປປ ລາວ ແລະ ບັນດາປະເທດອ້ອມຂ້າງ ເຊັ່ນ: ໄທ, ກຳປູເຈຍ, ມຽນມາ ແລະ ຫວຽດນາມ ກໍຄືທົ່ວໂລກ.
ພາຍຫຼັງສ້າງສຳເລັດແລ້ວ ຈະສາມາດດຶງດູດຜູ້ທີ່ນັບຖືສາສະໜາພຸດ ກໍຄື ນັກທ່ອງທ່ຽວຈາກປະເທດອ້ອມຂ້າງ ແລະ ຈາກທົ່ວທຸກມູມໂລກ ເຂົ້າມາກາບໄຫວ້ບູຊາ ເປັນຈຳນວນຫຼວງຫຼາຍໃນແຕ່ລະປີ, ເຊິ່ງເປັນການດຶງດູດນັກທ່ອງທ່ຽວ ໃຫ້ເຂົ້າມາທ່ຽວ ສປປ ລາວ ໃຫ້ນັບມື້ນັບຫຼາຍຂຶ້ນ ເຊິ່ງຈະສ້າງລາຍຮັບໃຫ້ກັບປະເທດ ແລະ ປະຊາຊົນລາວ ເປັນຈຳນວນຫຼວງຫຼາຍ.
ຮຽບຮຽງຂ່າວ: ພຸດສະດີ