ເວັບໄຊ ລາວທຽນທາມ ລາຍງານວ່າ ພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ໄດ້ອະນຸມັດການປະເມີນທໍ່ລະບາຍນໍ້າໃນເມືອງຫຼວງຂອງປະເທດເພື່ອປ້ອງກັນນໍ້າຖ້ວມທີ່ສີ່ແຍກທາດຫຼວງ.
ອີງຕາມການລາຍງານຈາກ ໜັງສືພິມວຽງຈັນທາມ ໃຫ້ຮູ້ວ່າ ບໍລິສັດ ຮັງກາລີ Laoprojekt Zrt, ໄດ້ຮັບອະນຸຍາດໃຫ້ດຳເນີນການສຳຫຼວດ, ເຊິ່ງໄດ້ເປີດເຜີຍວ່າໄພນໍ້າຖ້ວມທີ່ຈຸດສີ່ແຍກທາດຫຼວງນັ້ນແມ່ນເກີດມາຈາກການຂາດການບຳລຸງຮັກສາທີ່ຖືກຕ້ອງ ແລະ ການອຸດຕັນຂອງຂີ້ເຫຍື້ອ.
ລາຍງານຈາກບໍລິສັດ ສະແດງໃຫ້ເຫັນວ່າ ທໍ່ນໍ້າທີ່ມີຂະໜາດ P100, P80 ແລະ P60 ແມ່ນບໍ່ສາມາດຮັບນໍ້າໄດ້ພຽງພໍ ເຊິ່ງມັນເຮັດໃຫ້ເກີດບັນຫານໍ້າບໍ່ສາມາດລະບາຍ ຫຼື ໄຫຼໄດ້ຢ່າງຖືກຕ້ອງໃນເວລາທີ່ຝົນຕົກໜັກ.
ອີງຕາມບົດລາຍງານ, ບໍລິສັດ ລັດວິສາຫະກິດ ວິສະວະກຳ ນໍ້າ ແລະ ສິ່ງແວດລ້ອມ ກຳລັງຮ່າງແຜນການທຳຄວາມສະອາດ ແລະ ກໍ່ສ້າງລະບົບທໍ່ລະບາຍນໍ້າ, ທໍ່ໃໝ່ ຄວາມຍາວ 780 ແມັດຈະຖືກຕິດຕັ້ງເພື່ອແກ້ໄຂບັນຫານໍ້າຖ້ວມທີ່ເກີດຂຶ້ນເລື້ອຍໆ, ເຊິ່ງວຽກງານດັ່ງກ່າວ ໄດ້ຮັບການສະໜັບສະໜູນງົບປະມານຈາກໂຄງການບໍາບັດນໍ້າ ຂອງຮັງກາລີ ໃນປີ 2018.
ການທຳຄວາມສະອາດທໍ່ ແລະ ການຕິດຕັ້ງລະບົບທໍ່ໃໝ່ຄາດວ່າຈະສາມາດແກ້ໄຂບັນຫາໄດ້, ພ້ອມທັງຫວັງວ່າຈະສາມາດໃຫ້ຄວາມຮູ້ແກ່ປະຊາຊົນກ່ຽວກັບບັນຫາຂີ້ເຫຍືອທີ່ອຸດຕັນທໍ່ລະບາຍນໍ້າ.
ຮຽບຮຽງຂ່າວ: ພຸດສະດີ