ເວັບໄຊ sanook ລາຍງານວ່າ ຕິ໊ກຕອກ ວາງແຜນຈະຢື່ນຟ້ອງລັດຖະບານ ສ.ອາເມລິກາ ໃນອາທິດນີ້ ພາຍຫຼັງທີ່ປະທານາທິບໍດີ ໂດນັລ ທຣໍ້າ ໄດ້ລົງນາມໃນຄຳສັ່ງບໍລິຫານເພື່ອສັ່ງຫ້າມ TikTok ແລະ WeChat ແອັບພຣິເຄຊັ່ນຊື່ດັງຂອງຈີນ.
ເນຊັ່ນແນລ ພັບລິດ ເຣດິໂອ ລາຍງານໂດຍອ້າງແຫຼ່ງຂ່າວວ່າ TikTok ກຽມຢື່ນຟ້ອງລັດຖະບານ ສ. ອາເມລິກາໃນວັນອັງຄານນີ້ ລວມທັງຊີີ້ແຈ້ງວ່າ ການດຳເນີນການຂອງ ທຣໍ້າ ຂັດກັບລັດຖະທຳມະນູນ ເນື່ອງຈາກ ທຣໍ້າ ບໍ່ໄດ້ເປີດໂອກາດໃຫ້ບໍລິສັດໄດ້ຊີ້ແຈງ ແລະ ການດຳເນີນການໂດຍອ້າງເຫດຜົນເລື່ອງຄວາມໝັ້ນຄົງຂອງອາເມລິກາ ເຊິ່ງເປັນເລື່ອງທີ່ບໍ່ມີຂໍ້ມູນ.
ເມື່ອວັນທີ 7 ສິງຫາ ທີ່ຜ່ານມາ TikTok ໄດ້ໂພສລົງບລັອກ ຫຼັງຈາກທີ່ຜູ້ນຳອາເມລິກາອອກຄຳສັ່ງຫ້າມ ການດຳເນີນການດັ່ງກ່າວ ສ້າງຄວາມກັງວົນ ແລະ ບໍລິສັດຈະດຳເນີນການທຸກຊ່ອງທາງເພື່ອຫາວິທີທາງແກ້ໄຂ.
ທັງນີ້, ທຣໍ້າ ໄດ້ລົງນາມຄຳສັ່ງປະທານາທິບໍດີ ສັ່ງຫ້າມບໍ່ໃຫ້ບຸກຄົນ ຫຼື ບໍລິສັດອາເມລິກາເຮັດທຸລະກຳໃດໆກັບບໍລິສັດ ໄບແດນຊ໌ (ByteDance) ເຊິ່ງເປັນບໍລິສັດເຈົ້າຂອງ ຕິ໊ກຕັອກ ໂດຍມີຜົນບັງຄັບໃຊ້ໃນອີກ 45ວັນ.
ຮຽບຮຽງຂ່າວ: ພຸດສະດີ