ເວັບໄຊ independent ລາຍງານເມື່ອວັນທີ 6 ສິງຫາວ່າ ທ່ານ ໂດນັລ ທຣໍ້າ ປະທານາທິບໍດີ ສ. ອາເມລິກາ ໃຫ້ສຳພາດສະແດງຄວາມເຫັນເຖິງຄວາມເປັນໄປໄດ້ທີ່ ສ.ອາເມລິກາ ຈະພັດທະນາວັກຊີນໂຄວິດ-19 ຈົນສຳເລັດ ແລະ ຜະລິດອອກສູ່ຕະຫຼາດໄດ້ກ່ອນການເລືອກຕັ້ງທົ່ວໄປຂອງ ສ.ອາເມລິກາ ທີ່ຈະຈັດຂຶ້ນໃນວັນທີ 3 ພະຈິກ 2020ນີ້ ໂດຍປະທານາທິບໍດີ ທຣໍ້າ ຢືນຢັນໃນການໃຫ້ສຳພາດວ່າ ວັກຊີນໂຄວິດ-19 ຄວນພ້ອມໃຊ້ງານໃຫ້ໄດ້ໄວກວ່າທ້າຍປີນີ້.
ຄວາມໝັ້ນໃຈຂອງຜູ້ນຳ ສ. ອາເມລິກາ ຄົນນີ້ໄດ້ຂັດແຍ້ງກັບຂໍ້ມູນຂອງຜູ້ຊ່ຽວຊານດ້ານສາທາລະນະສຸກຫຼາຍຄົນ ໂດຍສະເພາະ ດຣ. ແອນໂທນີ ຟາວຊີ ຜູ້ອຳນວຍການສະຖາບັນໂຣກພູມແພ້ ແລະ ໂຣກຕິດເຊື້ອແຫ່ງ ສ.ອາເມລິກາ ທີ່ຢືນຢັນວ່າ ວັກຊີນໂຄວິດ-19 ຂອງອາເມລິກາ ຈະຍັງບໍ່ພ້ອມໃຊ້ງານໄປອີກຫຼາຍເດືອນ ໂດຍອາດຈະໃຊ້ງານໄດ້ໃນປີ 2021 ແຕ່ມັນກໍ່ມີຂໍ້ສົງໃສເຖິງການພັດທະນາວັກຊີນໃຫ້ສຳເລັດໃນທ້າຍປີນີ້ ແຕ່ທຸກຢ່າງມັນກໍ່ເກີດຂຶ້ນໄດ້.
ການໃຫ້ສຳພາດຂອງປະທານາທິບໍດີ ທຣໍ້າ ໃນຄັ້ງນີ້ຖືກຕັ້ງຄຳຖາມເຖິງຄວາມໜ້າເຊື່ອຖືອີກຄັ້ງ ຫຼັງຈາກວັນທີ 5 ສິງຫາ ເວັບໄຊ npr ລາຍງານວ່າ ເຄືອຂ່າຍສັງຄົມອອນລາຍຢ່າງ Facebook ແລະ Twitter ໄດ້ປະກາດຖອນໂພສວິດີໂອຄລິບດັ່ງກ່າວຂອງປະທານາທິບໍດີ ໂດນັລ ທຣໍ້າ ດ້ວຍເຫດຜົນລະເມີດກ່ຽວກັບການເຜີຍແຜ່ຂໍ້ມູນເທັດ.
ຮຽບຮຽງຂ່າວ: ພດສະດີ