ເວັບໄຊ vietnamnews.vn ລາຍງານ ເມື່ອວັນທີ 3 ສິງຫານີ້ ກະຊວງສາທາລະນະສຸກຂອງຫວຽດນາມອອກຖະແຫຼງການເມື່ອວ່າ ຈຳນວນຜູ້ເສຍຊີວິດສະສົມຈາກໂຣກໂຄວິດ-19 ເພີ່ມເປັນຢ່າງໜ້ອຍ 6 ຄົນ ແລະ ມີຜູ້ປ່ວຍຕິດເຊື້ອສະສົມ 621 ຄົນ ຮັກສາຫາຍແລ້ວ 373 ຄົນ ແລະ ຍັງເຫຼືອຜູ້ປ່ວຍທີ່ຕ້ອງຮັກສາຕົວໃນໂຮງໝໍ 242 ຄົນ.
ທ່ານ ຫວຽນ ທັນ ລອງ ລັດຖະມົນກະຊວງສາທາລະນະສຸກຂອງຫວຽດນາມ ກ່າວໃນຊ່ວງໜຶ່ງຂອງການຖະແຫຼງເມື່ອວັນອາທິດວ່າ ການສອບສວນຫາ “ແຫຼ່ງຕົ້ນຕໍແທ້ຈິງ” ຂອງເຊື້ອໄວຣັດໂຄໂຣນາສາຍພັນໃໝ່ໃນເມືອງດານັງ ເຊິ່ງພົບຜູ້ຕິດເຊື້ອໃນຊຸມຊົນເມື່ອວັນທີ 25 ກໍລະກົດ ທີ່ຜ່ານມາ ເປັນຄັ້ງທຳອິດໃນຮອບ 99 ວັນ ຍັງເປັນເລື່ອງຍາກ ເພາະຜົນການສອບສວນໂຣກບົ່ງຊີ້ວ່າຜູ້ປ່ວຍໄດ້ຮັບເຊື້ອຈາກສະຖານທີ່ຫຼາຍແຫ່ງ.
ນອກຈາກນີ້, ສາຍພັນຂອງເຊື້ອໄວຣັດໂຄໂຣນາທີ່ພົບຄັ້ງໃໝ່ໃນເມືອງດານັງ “ແຕກຕ່າງຫຼາຍ” ເມື່ອທຽບກັບເຊື້ອໄວຣັດໂຄໂຣນາທີ່ແຜ່ລະບາດເມື່ອຕົ້ນປີນີ້ ເພາະຕິດຕໍ່ກັນງ່າຍຫຼາຍ ໂດຍຜົນການວິເຄາະເບື້ອງຕົ້ນທາງລະບາດວິທະຍາພົບວ່າ ຕອນນີ້ຜູ້ປ່ວຍ 1 ຄົນ ສາມາດແຜ່ເຊື້ອໃຫ້ຄົນອື່ນໄດ້ເຖິງ 5-6 ຄົນ ແຕ່ອັດຕາການຕິດເຊື້ອເມື່ອຊ່ວງການລະບາດຮອບທຳອິດມີພຽງ 1.8 ເຖິງ 2.2 ຄົນ ຕໍ່ຜູ້ປ່ວຍ 1 ຄົນເທົ່ານັ້ນ.
ຮຽບຮຽງຂ່າວ: ພຸດສະດີ