ສຳນັກຂ່າວສານປະເທດລາວ ລາຍງານໃຫ້ຮູ້ວ່າ ໃນເວລາ 7:30 ຂອງວັນທີ 27 ກໍລະກົດ 2020, ໄດ້ມີການເຄື່ອນຍ້າຍຂະບວນແຫ່ ພຣະເຈົ້າໄຊຍະເຊດຖາທິຣາດ ມະຫາຣາດ ພ້ອມຊ້າງ ແລະ ພຣະພຸດທະຮູບ ອອກຈາກວັດພຣະທາດຫຼວງ ນະຄອນຫຼວງວຽງຈັນ ເພື່ອໄປປະດິດສະຖານ ຢູ່ແຂວງອັດຕະປື ໂດຍໄດ້ແວ່ພັກຄ້າງຄືນ ເພື່ອເຮັດພິທີທາງສາສະໜາ ຮັບບໍລິຈາກ ຈາກມວນຊົນຊາວແຂວງບໍລິຄຳໄຊ.
ການເຄື່ອນຂະບວນ ແຫ່ພຣະເຈົ້າໄຊເຊດຖາທິຣາດ ຄັ້ງນີ້ ນຳພາໂດຍ ທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ, ຜູ້ຊີ້ນຳວຽກງານວັດທະນະທຳ.
ພິທີໃສ່ບາດ ຖວາຍສັງຄະທານ ແດ່ພະສົງ-ສາມະເນນ ເນື່ອງໃນໂອກາດງານສະເຫຼີມສະຫຼອງ ຮູບຫຼໍ່ພຣະເຈົ້າໄຊຍະເຊດຖາທິຣາດ ມະຫາຣາດ ຊົງຊ້າງ ໄດ້ຈັດຂຶ້ນ ໃນຕອນເຊົ້າຂອງວັນທີ 26 ກໍລະກົດ 2020 ນີ້, ຢູ່ທີ່ຫໍທຳມະສະພາ, ວັດພຣະທາດຫຼວງ, ນະຄອນ ຫຼວງວຽງຈັນ, ໂດຍມີ ທ່ານ ຈູມມາລີ ໄຊຍະສອນ ອະດີດປະທານປະເທດ, ພ້ອມດ້ວຍ ບັນດາການຳພັກ-ລັດ, ທ່ານລັດຖະມົນຕີ, ຮອງລັດຖະມົນຕີ ແລະ ມວນຊົນຊາວນະຄອນຫຼວງວຽງຈັນ ຈຳນວນຫຼວງເຂົ້າຮ່ວມຢ່າງຫຼວງຫຼາຍ.
ການຈັດງານບຸນໃນຄັ້ງນີ້ເພື່ອ ອຸທິດບຸນກຸສົນ ແລະ ສະແດງເຖິງ ຄວາມກະຕັນຍູຮູ້ບຸນຄຸນຕໍ່ບັນພະບຸລຸດ ໂດຍສະເພາະພຣະເຈົ້າ ໄຊຍະເຊດຖາທິຣາດ ມະຫາຣາດ ວິລະກະສັດຜູ້ອົງອາດກ້າແກ່ນ, ພະອົງເປັນກະສັດອົງໜຶ່ງທີ່ມີຄຸນງາມຄວາມດີ ຕໍ່ປະເທດຊາດບ້ານເມືອງ, ເປັນຜູ້ນຳພາສ້າງບ້ານແປງເມືອງ ເປັນຕົ້ນແມ່ນການສະຖາປະນານະຄອນຫຼວງວຽງຈັນ ເປັນນະຄອນຫຼວງຂອງປະເທດ, ສ້າງພະທາດຫຼວງວຽງຈັນ, ພະພຸດທະຮູບ, ວັດວາອາຣາມ ແລະ ສະຖານບູ ຮານຕ່າງໆທີ່ເປັນພື້ນຖານທາງ ດ້ານວັດທະນະທຳຂອງປະເທດ ຊາດ ແລະ ພຸດທະສາສະໜາ ສືບທອດມາເຖິງທຸກວັນນີ້, ເຊິ່ງຄົນຮຸ່ນໜຸ່ມ ຈະໄດ້ສຶກສາຮຽນຮູ້, ປົກປັກ ຮັກສາ ແລະ ເສີມຂະຫຍາຍຕໍ່ໄປ.
ຮຽບຮຽງຂ່າວ: ພຸດສະດີ