ໜັງສືພິມວຽງຈັນທາມ ລາຍງານໃຫ້ຮູ້ວ່າ ເກີດເຫດຕົວະເດັກນ້ອຍເພດຊາຍ ຊື່ທ້າວ ຕຸກຕິກ ຂຶ້ນລົດເພື່ອໄປເອົາເງິນ ມື້ເຊົ້ານີ້ ວັນທີ 23 ກໍລະກົດ ເວລາປະມານ 9 ໂມງ ຢູ່ບ້ານເມືອງນ້ອຍ ເມືອງໄຊເສດຖາ ນະຄອນຫຼວງວຽງຈັນ ຮອດປັດຈຸບັນນີ້ ຍັງບໍ່ເຫັນຕົວຜູ້ກ່ຽວ ແລະ ຍັງບໍ່ຮູ້ຊາຕາກໍາ.
ຜູ້ເຫັນເຫດການໄດ້ກ່າວຕໍ່ທີມງານວຽງຈັນທາຍວ່າ: ເວລາປະມານ 8:50 ນາທີ ໄດ້ມີຜູ້ຍິງຖືພາໄດ້ຂີ່ລົດເກັງສີດໍາ (ບໍ່ຮູ້ໝາຍເລກທະບຽນ) ໄດ້ມາຊື້ເຂົ້າສານ 4 ເປົາ ແລະ ໄຂ່ 4 ແຕະ ຢູ່ຮ້ານແມ່ຂອງເດັກຊາຍຄົນດັ່ງກ່າວຢູ່ບ້ານເມືອງນ້ອຍ ແຕ່ບໍ່ທັນໄດ້ຈ່າຍ ເງິນ, ຍິງຄົນດັ່ງກ່າວໄດ້ບອກໃຫ້ທ້າວ ຕຸກຕິກ ຂຶ້ນລົດໄປກັບລາວ ເພື່ອໄປເອົາເງິນ ແຕ່ເມື່ອຂຶ້ນລົດແລ້ວທັງສອງກໍ່ໄດ້ຂີ່ລົດອອກໄປ ບໍ່ຮູ້ວ່າໄປໃສ, ຮອດປັດຈຸບັນນີ້ ຍັງບໍ່ພົບເຫັນທ້າວຕຸກຕິກເທື່ອ.
ກອງຫຼອນບ້ານເມືອງນ້ອຍ ແລະ ເຈົ້າໜ້າທີ່ກ່ຽວຂ້ອງກໍາລັງເລັ່ງຕິດຕາມຊອກຫາເດັກຊາຍຄົນດັ່ງກ່າວ, ຖ້າມີຄວາມຄືບໜ້າຈະລາຍງານຕາມພາຍຫຼັງ. ທ່ານໃດພົບເຫັນລົດຜູ້ຕ້ອງສົງໃສ ຫຼື ເດັກນ້ອຍຕາມຮູບກະລຸນາໂທຫາເບີ 0302277349 ຈະມີການສົມມະນາຄຸນ.
ຮຽບຮຽງຂ່າວ: ພຸດສະດີ