spot_img
Homeຂ່າວທ້ອງຖິ່ນແຫ່ຮູບປັ້ນພະເຈົ້າໄຊເຊດຖາທິຣາດ ໄປວັດພະທາດຫຼວງ ກຽມສົ່ງໄປແຂວງອັດຕະປື

ແຫ່ຮູບປັ້ນພະເຈົ້າໄຊເຊດຖາທິຣາດ ໄປວັດພະທາດຫຼວງ ກຽມສົ່ງໄປແຂວງອັດຕະປື

Published on

ສຳນັກຂ່າວສານປະເທດລາວ ລາຍງານວ່າ ໃນວັນທີ 21 ກໍລະກົດ 2020, ທີ່ນະຄອນຫຼວງວຽງຈັນ ມີຂະບວນຄູບາ, ອາຈານ ແລະ ພະສົງ ລວມທັງອະດີດປະທານປະເທດ ທ່ານ ຈູມມາລີ ໄຊຍະສອນ ແລະ ມວນຊົນນັບຮ້ອຍຄົນ ໄດ້ຮ່ວມຂະບວນແຫ່ຮູບປັ້ນພະເຈົ້າໄຊເຊດຖາທິຣາດມະຫາຣາດ, ຊ້າງ ແລະ ພະພຸດທະຮູບຈໍານວນໜຶ່ງ ໄປຍັງຫໍທຳມະສະພາ ວັດພະທາດຫຼວງເໜືອ ເມືອງໄຊເຊດຖາ ນະຄອນຫລວງວຽງຈັນ, ເພື່ອດຳເນີນການສະເຫຼີມສະຫຼອງຮູບປັ້ນ ໃນລະຫວ່າງ ວັນທີ 21-25 ກໍລະກົດ ແລະ ຈະໄດ້ນໍາສົ່ງໄປປະດິດສະຖານໄວ້ທີ່ອະນຸສາວະລີ ພະເຈົ້າໄຊເຊດຖາທິຣາດ ບ້ານ ຫາດຊາຍຂາວ ເມືອງໄຊເຊດຖາ ແຂວງອັດຕະປື.

ຕະຫຼອດ 5 ວັນດັ່ງກ່າວ, ຈະມີງານບຸນສະເຫຼີມສະຫຼອງຮູບປັ້ນພະເຈົ້າ ໄຊເຊດຖາທິຣາດ ມະຫາຣາດ ພ້ອມທັງຮັບຟັງສູດປະຣິຕະມຸງຄຸນ, ຟັງທຳມະເທດສະໜາປາຣະມີ 30 ທັດ ເສີມບຸນປາຣະມີ ຈາກພະສົງ 39 ອົງ, ໄຫວ້ພະສູດມົນ ຈະເລີນສະມາທິພາວະນາ ຟັງທຳມະເທດສະໜາ. ສ່ວນໃນຕອນເຊົ້າວັນທີ 26 ກໍລະກົດ ຈະມີພິທີຕັກບາດຖວາຍທານ ແດ່ພະສົງ 39 ອົງ. ຈາກນັ້ນ, ຈະມີພິທີຂະບວນ ເຄື່ອນຮູບຫລໍ່ພະເຈົ້າໄຊເຊດຖາທິຣາດ ມະຫາຣາດ ອອກຈາກນະຄອນຫຼວງວຽງຈັນ ໂດຍຜ່ານ ແຂວງຕ່າງໆເປັນຕົ້ນ ແຂວງບໍລິຄຳໄຊ ໃນວັນທີ 27, ແຂວງຄຳມ່ວນ ໃນວັນທີ 28, ແຂວງສະຫວັນນະເຂດ ໃນວັນທີ 29, ແຂວງຈຳປາສັກ ໃນວັນທີ 30 ກໍລະກົດ 2020 ເຊິ່ງແຕ່ລະແຂວງ ຈະປະກອບພິທີບຳເພັນບຸນ 1 ວັນ, ສ່ວນວັນທີ 31 ກໍລະກົດ ຂະບວນແຫ່ດັ່ງກ່າວ ຈະຮອດແຂວງອັດຕະປື ຈາກນັ້ນຈະມີພິທີຍົກພະໄຊຍະເຊດຖາທິຣາດມະຫາຣາດ ປະດິດສະຖານໄວ້ທີ່ ພະແທ່ນອະນຸສາວະລີ.

ທ່ານ ອຸນຫລ້າ ໄຊຍະສິດ ຮອງເຈົ້າແຂວງອັດຕະປື ໃຫ້ຮູ້ວ່າ: ໂຄງການກໍ່ສ້າງອານຸສາວະລີ ພະເຈົ້າໄຊຍະເຊດຖາທິຣາດ ມະຫາຣາດ ຊົງປະທັບຊ້າງ ປະທານພອນ ທີ່ຫລໍ່ດ້ວຍທອງເຫຼືອງເນື້ອບໍລິສຸດ, ມີນໍ້າໜັກ 18 ໂຕນ, ຄວາມສູງ 9 ແມັດ ແລະ ມູນຄ່າກໍ່ສ້າງປະມານ 39 ຕື້ກີບ. ອານຸສາວະລີ ພະເຈົ້າໄຊຍະເຊດຖາທິຣາດ ສ້າງຂຶ້ນເພື່ອຈາລຶກຄຸນງາມຄວາມດີ, ວິລະກຳຂອງພະເຈົ້າໄຊເຊດຖາທິຣາດມະຫາຣາດ ທີ່ໄດ້ນຳພາໃນການຕໍ່ສູ້ ແລະ ປົກປັກຮັກສາອານາຈັກລ້ານຊ້າງ ໃນເວລານັ້ນ, ທັງເປັນການເຊີດຊູກຽດສັກສີ ຂອງວີລະກະສັດລາວລ້ານຊ້າງ ຜູ້ສະຫຼຽວສະຫຼາດອົງອາດກ້າແກ່ນມີຄວາມປີຊາສາມາດ ເປັນແວ່ນແຍງອັນໃສແຈ້ງແກ່ລູກຫຼານ ໄດ້ສຶກສາຫາຄວາມຮູ້ ແລະ ຮໍ່າຮຽນເອົາເປັນແບບຢ່າງ.

 

ຮຽບຮຽງຂ່າວ: ​ພຸດສະດີ

ບົດຄວາມຫຼ້າສຸດ

ທ່ານ ເຫຼັກໄຫຼ ສີວິໄລ ລົງຕິດຕາມເສັ້ນທາງ 2W ແຕ່ເມືອງໄຊ ຫາເມືອງ ປາກແບ່ງ ແຂວງອຸດົມໄຊ

ທ່ານ ເຫຼັກໄຫຼ ສີວິໄລ ລັດຖະມົນຕີກະຊວງ ຍທຂ ພ້ອມຄະນະລົງຕິດຕາມເສັ້ນທາງ 2W ແຕ່ເມືອງໄຊ ຫາເມືອງ ປາກແບ່ງ ແຂວງອຸດົມໄຊ. ໃນວັນທີ 9 ສິງຫາ 2025...

ຍີ່ປຸ່ນທຸບສະຖິຕິໃໝ່! ກວດພົບຄື້ນຄວາມຮ້ອນ ອຸນຫະພູມ 41.8 ອົງສາ ພ້ອມເຕືອນໄພປະຊາຊົນໃຫ້ອອກຈາກພື້ນທີ່ສ່ຽງ

ຍີ່ປຸ່ນທຸບສະຖິຕິອາກາດຮ້ອນສູງສຸດ 41.8 ອົງສາ ເຈົ້າໜ້າທີ່ເລັ່ງອົບພະຍົບປະຊາຊົນ ພ້ອມເຕືອນໂຣກລົມແດດ 44 ແຂວງໃນຍີ່ປຸ່ນ ຂະນະດຽວກັນພາກເໜືອຮັບມືຝົນຕົກໜັກ-ສ່ຽງນ້ຳຖ້ວມຊຸ. ສຳນັກຂ່າວຕ່າງປະເທືດລາຍງານໃນວັນທີ 7 ສິງຫາ 2025 ສຳນັກງານອຸຕຸນິຍົມວິທະຍາຂອງປະເທດຍີ່ປຸ່ນ (Japan Meteorological...

ຄະນະບໍລິຫານງານພັກກະຊວງປ້ອງກັນຄວາມ ສະຫງົບ ສະໄໝທີ VI ປະກອບມີ 27 ສະຫາຍ ຍິງ 1 ສະຫາຍ

ຊົມເຊີຍ ຜົນສຳເລັດກອງປະຊຸມຄັ້ງປະຖົມມະລຶກກອງປະຊຸມໃຫຍ່ຜູ້ແທນ ຄັ້ງທີ VI ອົງຄະນະພັກກະຊວງປ້ອງກັນຄວາມສະຫງົບ ໃນຕອນເຊົ້າວັນທີ 6 ສິງຫາ 2025, ສະຫາຍ ພົອ ວິໄລ ຫຼ້າຄຳຟອງ ໄດ້ລາຍງານຜົນຂອງກອງປະຊຸມຄັ້ງປະຖົມມະລຶກຄະນະບໍລິຫານງານພັກກະຊວງປ້ອງກັນຄວາມສະຫງົບ ສະໄໝທີ...

ລາວປະເຊີນບັນຫາພລາສຕິກລົ້ນຕະຫຼາດທ່າມກາງລາຄາຕົກຕໍ່າ

ເສດຖົງຢາງທີ່ເກົ່າໝອງຈົນເກືອບແຍກສີບໍ່ອອກ ບວກກັບຕຸກນໍ້າພລາສຕິກທີ່ຖືກຖິ້ມຊະຊາຍເປັນວົງກວ້າງໃນນະຄອນຫຼວງວຽງຈັນ ເປັນພຽງສ້ຽວໜຶ່ງຂອງເລື່ອງເລົ່າກ່ຽວກັບພລາສຕິກຂອງເມືອງຫຼວງແຫ່ງນີ້. ພາຍໃຕ້ມົນລະມິດທີ່ສາມາດເບິ່ງເຫັນໄດ້ດ້ວຍຕາເປົ່ານີ້ ລ້ວນແຕ່ເຊື່ອງຊ້ອນວິກິດການຂັ້ນຮ້າຍແຮງກວ່າທີ່ຄິດໄວ້. ເນື່ອງຈາກສິ່ງດັ່ງກ່າວໄດ້ກາຍເປັນໄພຂົ່ມຂູ່ຕໍ່ສິ່ງແວດລ້ອມທາງທໍາມະຊາດຂອງລາວ ທັງເປັນໄພຂົ່ມຂູ່ຕໍ່ສຸຂະພາບຂອງຜູ້ຄົນຫຼາຍຮ້ອຍ ທີ່ຕ້ອງເພິ່ງພາການຊື້-ຂາຍສິ່ງເສດເຫຼືອປະເພດພລາສຕິກ. ໃນລະຫວ່າງວັນທີ 5 ຫາ 14 ສິງຫາ, ບັນດາຜູ້ນໍາຈາກຫຼາຍປະເທດໃນໂລກຈະມາເຕົ້າໂຮມກັນທີ່ ເຈນີວາ, ປະເທດສະວິດເຊີແລນ...