ເວັບໄຊ ເດລີເມລ ຂອງອັງກິດ ລາຍງານວ່າ ມີຄວາມຫວັງເພີ່ມຂຶ້ນສຳລັບວັກຊີນທີ່ຈະໃຊ້ຮັກສາຜູ້ປ່ວຍໂຄວິດ-19 ເນື່ອງຈາກສອງໂຄງການທັງໃນປະເທດອັງກິດ ແລະ ສະຫະລັດອາເມລິກາໄດ້ລາຍງານຜົນລັບທີ່ມີແນວໂນ້ມທີ່ດີໃນການທົດລອງເບື້ອງຕົ້ນ.
ທີມຈາກມະຫາວິທະຍາໄລ ອັອກຟອດ ແລະ ບໍລິສັດ ຢາອາເມລິກາ ໂມເດີຣາ ໄດ້ເປີດເຜີຍວ່າ ຜູ້ທີ່ເຂົ້າຮ່ວມໃນໂຄງການ ກຳລັງສະແດງສັນຍານຂອງການສ້າງພູມຄຸ້ມກັນ. ທີມງານແຕ່ລະຄົນໄດ້ແຍກກັນ ທົດລອງມາຫຼາຍເດືອນເພື່ອພະຍາຍາມປົກປ້ອງຜູ້ຄົນນັບລ້ານຈາກການລະບາດຂອງໄວຣັດໂຄໂຣນາ ໃນອານາຄົດ.
ນັກວິທະຍາສາດຈາກມະຫາວິທະຍາໄລ ອັອກຟອດ ໄດ້ກ່າວວ່າ ພວກເຂົາມີຄວາມເຊື່ອໝັ້ນ 80% ວ່າຈະສາມາດສ້າງວັກຊີນໂຕນີ້ໄດ້ສຳເລັດໃນເດືອນກັນຍານີ້. ຄົນທີ່ໄດ້ຮັບວັກຊີນຈາກຫ້ອງທົດລອງໃນອັອກຟອດໄດ້ພັດທະນາພູມຄຸ້ມກັນ ແລະ ເຊວເມັດເລືອດຂາວ ທີ່ມີຊື່ວ່າ T cell ເຊິ່ງຈະຊ່ວຍໃຫ້ຮ່າງກາຍຂອງພວກເຂົາຕໍ່ສູ້ກັບໄວຣັດຫາກຕິດເຊື້ອ. ເຊິ່ງວັກຊີນຈະເຮັດວຽກໂດຍການຫຼອກໃຫ້ຄິດວ່າຕິດເຊື້ອ Covid-19 ແລະ ເຮັດໃຫ້ຜະລິດສານພູມຄຸ້ມກັນທີ່ມີຄວາມສາມາດໃນການທຳລາຍ.
ການທົດລອງໄລຍະທີ 3 ຂອງອັອກຟອດກ່ຽວກັບຜູ້ຄົນປະມານ 8,000 ຄົນ ໃນອັງກິດ ແລະ ຫຼາຍກວ່າ 6,000 ຄົນໃນບຣາຊິນ ແລະ ອາຟຣິກາໃຕ້. ວັກຊີນນີ້ຜະລິດໂດຍແອສຕຣ້າເຊເນກາ ເຊິ່ງຕັ້ງຢູ່ເມືອງເຄມບຣິດ ປະເທດອັງກິດ ແລະ ໄດ້ຮັບການສັ່ງຈ່າຍເປັນຈໍານວນຫຼາຍລ້ານໂດສແລ້ວ ດ້ວຍຄວາມຫວັງວ່າວັກຊີນໂຕນີ້ຈະສາມາດຕ້ານເຊື້ອໄດ້.
ຮຽບຮຽງຂ່າວ: ພຸດສະດີ