ຕົວເລກສະສົມຜູ້ປ່ວຍໂຄວິດ-19 ທົ່ວໂລກເພີ່ມຂຶ້ນທັງໝົດ 9 ລ້ານຄົນ ນັບເປັນອັດຕາຕົວເລກທີ່ເພີ່ມຂຶ້ນມາອີກ 1 ລ້ານຄົນ ພາຍໃນຊ່ວງໄລຍະເວລາພຽວ 7 ມື້ເທົ່ານັ້ນ.

ໜັງສືພິມ thairath ລາຍງານເມື່ອວັນທີ 22 ມິຖຸນານີ້ວ່າ ເວັບໄຊ worldometer.info ທີ່ເຮັດໜ້າທີ່ລວບລວມສະຖິຕິໂຄວິດ-19 ທົ່ວໂລກ ໄດ້ລາຍງານຕົວເລກຜູ້ຕິດເຊື້ອສະສົມທັງໝົດທົ່ວໂລກ ຫຼ້າສຸດ ເພີ່ມຂຶ້ນທີ່ 9,044,563 ຄົນແລ້ວ ເຊິ່ງນັບເປັນອັດຕາການເພີ່ມຢ່າງໄວວາເທົ່າທີ່ເຄີຍບັນທຶກສະຖິຕິມາ ນັບຕັ້ງແຕ່ເກີດການລະບາດຂຶ້ນເມື່ອເດືອນມັງກອນ 2020 ໂດຍມີຕົວເລກເພີ່ມຂຶ້ນ 1 ລ້ານຄົນ ໃນຊ່ວງເວລາພຽງ 7 ວັນ (15-22 ມິຖຸນາ) ເທົ່ານັ້ນ.

ສຳລັບຕົວເລກຜູ້ເສຍຊີວິດທົ່ວໂລກແມ່ນ 469,537 ຄົນ ທີ່ໄດ້ຮັບການປິ່ນປົວດີແລ້ວແມ່ນ 4.79 ລ້ານຄົນ ໂດຍອາເມລິກາມີຈຳນວນຜູ້ປ່ວຍສູງສຸດ 2.35 ລ້ານຄົນ ເສຍຊີວິດແລ້ວ 122,247 ຄົນ.

ສ່ວນປະເທດບຣາຊິວ ຕາມມາອັນດັບ 2 ມີຜູ້ຕິດເຊື້ອສະສົມ 1.08 ລ້ານຄົນ ເສຍຊີວິດແລ້ວ 50.659 ຄົນ ໂດຍປະເທດບຣາຊິວເປັນປະເທດທີ່ຜູ້ເສຍຊີວິດ 50.000 ຄົນ ແລະ ມີຜູ້ຕິດເຊື້ອສະສົມແຕະຫຼັກລ້ານຄົນ ດ້ານຜູ້ຊ່ຽວຊານຄາດວ່າຈຳນວນຜູ້ຕິດເຊື້ອແທ້ອາດສູງກວ່ານີ້ ເນື່ອງມາຈາກບຣາຊິວຍັງຂາດແຄນ ອຸປະກອນການກວດເຊື້ອ ແລະ ເຊື່ອວ່ານີ້ຍັງບໍ່ເຖິງຊ່ວງການລະບາດຂອງພະຍາດໃນລະດັບສູງສຸດ.

ຮຽບຮຽງຂ່າວ: ພຸດສະດີ