ເວັບໄຊ bbc ລາຍງານວ່າ ລັດຖະບານອິນເດຍປະກາດວ່າສູນເສຍທະຫານໄປຢ່າງໜ້ອຍ 20 ຄົນໃນການປະທະກັບກຳລັງຈີນ ໃນພື້ນທີ່ລາດັກ ດິນແດນແຄສເມຍ ພື້ນທີ່ພິພາດຂອງທັງ 2 ຊາດ ທີ່ພູຫິມາໄລ ເຊິ່ງເຫດການດັ່ງກ່າວເປັນການສູນເສຍຄັ້ງທຳອິດໃນຮອບ 45 ປີ ຫຼັງຄວາມຂັດແຍ້ງຂອງ 2 ຊາດ ໃນພື້ນທີ່ນີ້.
ການປະທະກັນໃນຄັ້ງນີ້ເກີດຂຶ້ນທ່າມກາງຄວາມສຳພັນສອງຝ່າຍເຄັ່ງຕຶງຂຶ້ນເລື່ອຍໆ ຫຼັງຈາກທີ່ອິນເດຍໄດ້ກ່າວວ່າ ຈີນສົ່ງທະຫານຫຼາຍພັນຄົນໄປທີ່ພູກາລາວານ (Galwan valley) ໃນພື້ນທີ່ລາດັກ ເຊິ່ງທາງອິນເດຍໄດ້ກ່າວວ່າ ຈີນເຂົ້າມາຄອບຄອງພື້ນທີ່ໃນດິນແດນຂອງຕົນ ໃນເນື້ອທີ່ 38,000 ກິໂລຕາແມັດ ແລະ ໄດ້ມີການເຈລະຈາເລື່ອງນີ້ຫຼາຍຮອບແລ້ວແຕ່ກໍ່ປະສົບຄວາມລົ້ມເຫຼວ.
ທາງດ້ານກອງທັບອິນເດຍລະບຸວ່າ ເຈົ້າໜ້າທີ່ທະຫານອາວຸໂຊຂອງທັງສອງຝ່າຍກຳລັງເຈລະຈາກັນ ເພື່ອຜ່ອນຄາຍຄວາມເຄັ່ງຕຶງຂອງສະຖານະການ ແລະ ຍັງບອກອີກວ່າມີຜູ້ເສຍຊີວິດທັງສອງຝ່າຍ.
ກ່ອນໜ້ານີ້, ສຳນັກຂ່າວ ຣອຍເຕີ ລາຍງານວ່າ ຈີນໄດ້ຕອບໂຕ້ໂດຍການຮຽກຮ້ອງບໍ່ໃຫ້ອິນເດຍດຳເນີນການໃດໆ ໂດຍບໍ່ຜ່ານການປຶກສາຫາລື ຫຼື ກໍ່ໃຫ້ເກີດບັນຫາ, ສ່ວນທາງສຳນັກຂ່າວ ເອເອຟພີ ລາຍງານວ່າ ຈີນກ່າວຫາວ່າທະຫານອິນເດຍຂ້າມຊາຍແດນເຂົ້າມາໂຈມຕີທະຫານຂອງອິນເດຍ ສົ່ງຜົນໃຫ້ເກີດການປະທະກັນຢ່າງຮຸນແຮງລະຫວ່າງກອງກຳລງທັງສອງຝ່າຍ.
ຮຽບຮຽງຂ່າວ: ພຸດສະດີ