ໜັງສືພິມເສດຖະກິດ-ການຄ້າ ລາຍງານໃຫ້ຮູ້ວ່າ ລັດຖະບານຍີ່ປຸ່ນໃຫ້ການຊ່ວຍເຫຼືອສືບຕໍ່ຍົກລະດັບລະບົບສາທາລະນະສຸກຂອງລາວກຽມພ້ອມຮັບມືຄວາມເປັນໄປໄດ້ຂອງການລະບາດທີ່ອາດເກີດການຕິດເຊື້ອຮອບໃໝ່.
ໃນວັນທີ 5 ມິຖຸນາ 2020 ນີ້ໄດ້ມີພິທີລົງນາມເອກະສານແລກປ່ຽນສຳລັບໂຄງການຊ່ວຍເຫຼືອລ້າທີ່ມີຊື່ວ່າ ໂຄງການພັດທະນາເສດຖະກິດ ແລະ ສັງຄົມ ທີ່ກະຊວງການຕ່າງປະເທດ ນະຄອນຫຼວງວຽງຈັນ. ເອກະສານດັ່ງກ່າວໄດ້ຮັບການລົງນາມ ແລະ ແລກປ່ຽນໂດຍ ພະນະທ່ານ ທາເກວາກະ ເຄໂຊ, ເອກອັກຄະຣະຊະທູດຍີ່ປຸ່ນປະຈຳ ສປປ ລາວ ແລະ ພະນະທ່ານ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດປະຈຳ ສປປ ລາວ ໂດຍມີໂຕແທນຈາກບັນດາກະຊວງເຂົ້າຮ່ວມເປັນສັກຂີພະຍານ.
ໂຄງການຊ່ວຍເຫຼືອລ້າທີ່ມີມູນຄ່າ 1.500 ລ້ານເຢນ (ປະມານ 13,7 ລ້ານໂດລ້າສະຫະລັດ) ຈະຖືກນຳໃຊ້ເຂົ້າໃນການຈັດຊື້ອຸປະກອນທາງການແພດຈຳພວກລົດໂຮງໝໍ ແລະ ຕຽງສຳລັບຜູ້ປ່ວຍ ເພື່ອມອບໃຫ້ແກ່ລັດຖະບານລາວຈັດມາດຕະການຕອບໂຕ້ ໂຄວິດ-19. ໃນຂະນະທີ່ປັດຈຸບັນ, ປະເທດລາວສາມາດຈຳກັດການແຜ່ກະຈາຍຂອງເຊື້ອໂຄວິດ-19 ໄດ້ຢ່າງມີປະສິດທິພາບ. ສະນັ້ນ, ເພື່ອເປັນການຕອບໂຕ້ກັບພະຍາດຮອບໃໝ່ ລັດຖະບານຍີ່ປຸ່ນຈິ່ງໃຫ້ການຊ່ວຍເຫຼືອສືບຕໍ່ຍົກລະດັບລະບົບສາທາລະນະສຸກຂອງລາວກຽມພ້ອມຮັບມືຄວາມເປັນໄປໄດ້ຂອງການລະບາດທີ່ອາດເກີດການຕິດເຊື້ອຮອບໃໝ່.
ຮຽບຮຽງຂ່າວ: ພຸດສະດີ