ກະຊວງການຕ່າງປະເທດ ໄດ້ອອກຄໍາແນະນໍາເມື່ອວັນທີ 7 ພຶດສະພາ 2020 ເຖິງບຸກຄົນ ຫຼື ນິຕິບຸກຄົນ ທີ່ຈະເດີນທາງເຂົ້າມາ ສປປ ລາວ ໃນໄລຍະດໍາເນີນມາດຕະການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຕ້ອງມີໃບຢັ້ງຢືນການກວດໂຄວິດ-19 ຈາກສະຖານທີ່ບໍລິການສາທາລະນະສຸກ ທີ່ສາມາດກວດສອບໄດ້ ແລະ ອອກໃຫ້ບໍ່ເກີນ 72 ຊົ່ວໂມງກ່ອນເດີນທາງເຂົ້າມາ.
ສໍາລັບພົນລະເມືອງລາວທີ່ມີຈຸດປະສົງຢາກ ເດີນທາງກັບປະເທດ ແມ່ນໃຫ້ລົງທະບຽນຢູ່ສະຖານ ເອກອັກຄະລັດຖະທູດ ຫຼື ສະຖານກົງສູນ ໃຫຍ່ ແຫ່ງ ສປປ ລາວ ຢູ່ປະເທດທີ່ຕົນອາໄສຢູ່ ເພື່ອອໍານວຍຄວາມສະດວກໃນການເດີນທາງກັບ.
ທຸກຄົນ ທີ່ເຂົ້າມາ ສປປ ລາວ ໃນໄລຍະນີ້ ແມ່ນຈະໄດ້ວັດແທກອຸນຫະພູມຮ່າງກາຍ ແລະ ໃຫ້ຈໍາກັດບໍລິເວນ 14 ວັນ ຢູ່ຕາມສູນຕ່າງໆ ແລະ ປະຕິບັດຕາມມາດຕະການຕ່າໆ ທີ່ທາງຄະນະສະເພາະກິດ ກໍ່ຄືລັດຖະບານ ກໍານົດໄວ້ຢ່າງເຂັ້ມງວດ. ຖ້າບໍ່ປະຕິບັດຕາມມາດຕະການຂອງຄະນະສະເພາະກິດວາງອອກ ແມ່ນຈະຖືກປະຕິບັດວິໄນ ຕາມກົດໝາຍ ແລະ ລະບຽບການຂອງ ສປປ ລາວ.
ສ່ວນຜູ້ທີ່ຕ້ອງການຈະເດີນທາງອອກຈາກ ສປປ ລາວ ໄປຕ່າງປະເທດ ແມ່ນສາມາດໄປໄດ້, ຖ້າໄດ້ຮັບອະນຸຍາດຈາກປະເທດ ທີ່ເດີນທາງໄປ ແຕ່ຕ້ອງໄດ້ປະຕິບັດຕາມກົດໝາຍ ແລະ ລະບຽບຂອງປະເທດດັ່ງກ່າວ.
ຮຽບຮຽງຂ່າວ: ພຸດສະດີ