ວັນທີ 27 ເມສາ ສຳນັກຂ່າວ AFP ລາຍງານວ່າ ນາຍົກລັດຖະມົນຕີຈາຊິນດາ ອາເດີນ (Jacinda Ardern) ຜູ້ນຳຍິງນິວຊີແລນ ປະກາດໄຊຊະນະການຕໍ່ສູ້ກັບໂຄວິດ-19 ຫຼັງປະເທດ ນິວຊີແລນ ໃຊ້ມາດຕະການປ້ອງກັນຂັ້ນສູງສຸດ ຫຼື ລະດັບ 4 ດົນເກືອບ 5 ອາທິດ ເຊິ່ງອະນຸຍາດສະເພາະພາກບໍລິການຈຳເປັນທີ່ເປີດບໍລິການໄດ້ ຈົນບໍ່ມີການລະບາດ ແລະ ບໍ່ມີການຕິດເຊື້ອໃນປະເທດອີກຕໍ່ໄປ ເຮັດໃຫ້ ນິວຊີແລນ ຫຼຸດລະດັບການປ້ອງກັນມາຢູ່ລະດັບ 3 ຕັ້ງແຕ່ຕອນຄໍ່າວັນທີ 27 ເມສາ, ພາກທຸລະກິດຕ່າງໆເຊັ່ນຮ້ານອາຫານທີ່ມີສະເພາະຊື້ກັບບ້ານ ແລະ ໂຮງຮຽນ ກັບມາເປີດໄດ້ອີກເທື່ອໜຶ່ງ.
ຢ່າງໃດກໍ່ຕາມ ຜູ້ນຳນິວຊີແລນເຕືອນວ່າ ຍັງບໍ່ມີຄວາມແນ່ນອນວ່າການຕິດເຊື້ອຈະໝົດແລ້ວ ເຖິງວ່າຈະອະນຸຍາດໃຫ້ປະຊາຊົນກັບມາໃຊ້ຊີວິດຕາມປົກກະຕິ ແຕ່ຈະຕ້ອງເຮັດຢ່າງຄ່ອຍເປັນຄ່ອຍໄປ ແລະ ລະມັດລະວັງ.
ປະເທດ ນິວຊີແລນ ຍົກເລີກການປິດເມືອງ ຫຼື Lockdown ຫຼັງມີລາຍງານກໍລະນີຕິດເຊື້ອໃໝ່ພຽງ 1 ກໍລະນີ, ກໍລະນີຕິດເຊື້ອສະສົມເພີ່ມເປັນ 1,122 ຄົນ, ເສຍຊີວິດ 19 ກໍລະນີ ຈາກປະຊາກອນທົ່ວປະເທດ 5 ລ້ານຄົນ.
ຮຽບຮຽງໂດຍ: ວະນິດາ