ໜັງສືພິມວຽງຈັນທາມລາຍງານ ເມື່ອວັນທີ 25 ເມສາ ທີ່ຜ່ານມາວ່າ ມີຜູ້ເສຍຊີວິດ 4 ຄົນ, ຫາຍສາບສູນ 3 ຄົນ ແລະ ບາດເຈັບ 1 ຄົນ ຈາກເຫດນໍ້າປ່າໄຫຼຫຼາກ ເນື່ອງຈາກຝົນຕົກໜັກຕິດຕໍ່ກັນຫຼາຍຊົ່ວໂມງ ທີ່ເມືອງ ຊຽງເງິນ ແຂວງ ຫຼວງພະບາງ ໃນເວລາປະມານ 8 ໂມງເຊົ້າຂອງວັນທີ 24 ເມສາ 2020 ທີ່ຜ່ານມາ.
ທ່ານ ພັນຕີ ວຽງເພັດ ພັນທະວົງ ນັກຂ່າວ ທີ່ປະຈຳຢູ່ກອງບັນຊາການທະຫານເມືອງ ຊຽງເງິນ ແຂວງ ຫຼວງພະບາງ ໄດ້ລາຍງານໃຫ້ຮູ້ວ່າ: ປະຊາຊົນບ້ານ ກີ່ວຕະລຸ່ນ 1 ເຂດກີ່ວກະຈຳ ເມືອງ ຊຽງເງິນ ແຂວງ ຫຼວງພະບາງ ເສຍຊີວິດຍ້ອນນໍ້າປ່າໄຫຼແຮງພັດຊຸ ເອົາປະຊາຊົນທີ່ພັກຢູ່ຕູບໄຮ່ ຈຳນວນ 2 ຄອບຄົວ ລວມມີ 10 ຄົນ ທີ່ໄປນອນໄຮ່ ຖືກນໍ້າປ່າໄຫຼຊຸພັດເອົາຈຶ່ງເກີດເຫດສູນເສຍດັ່ງກ່າວ.
ເຫດດັ່ງກ່າວເຮັດໃຫ້ມີຜູ້ບາດເຈັບ 1 ຄົນ ເປັນເພດຊາຍ, ເສຍຊີວິດ 4 ຄົນ ເປັນເພດຍິງ ແລະ ຫາຍສາບສູນ 3 ຄົນ, ເພດຍິງ 2 ຄົນ ແລະ ເພດຊາຍ 1 ຄົນ. ປະຈຸບັນເຈົ້າໜ້າທີ່ທະຫານເມືອງ ຊຽງເງິນ ຈຳນວນ 15 ຄົນ ໂດຍການຊີ້ນຳ-ນຳພາຂອງ ທ່ານ ພັນໂທ ທອງພັນ ບຸນທຳ ຮອງຫົວໜ້າການທະຫານກອງບັນຊາການທະຫານເມືອງຊຽງເງິນ ໄດ້ສົມທົມກັບເຈົ້າໜ້າທີ່ ກຸ່ມກີ່ວກະຈຳ ພວມສືບຕໍ່ເລັ່ງຄົ້ນຫາຄົນທີ່ຫາຍສາບສູນດັ່ງກ່າວ.
ຮຽບຮຽງຂ່າວ: ພຸດສະດີ