ໜັງສືພິມວຽງຈັນທາມ ລາຍງານໃຫ້ຮູ້ວ່າ ກະຊວງ ແຮງງານ ແລະ ສະຫວັດດີການສັງຄົມ (ຮສສ) ໄດ້ສະເໜີຕໍ່ກອງປະຊຸມເພື່ອແກ້ໄຂຜົນກະທົບຈາກການລະບາດພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ໂຄວິດ-19 ຕໍ່ເສດຖະກິດລາວ ເຊິ່ງກອງປະຊຸມດັ່ງກ່າວ ໄດ້ຈັດຂຶ້ນໃນຕອນເຊົ້າວັນທີ 20 ເມສາ 2020 ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງ ແຜນການ ແລະ ການລົງທຶນ. ຜົນຂອງກອງປະຊຸມອັນສໍາຄັນຈະໄດ້ນໍາສະເໜີຕໍ່ກອງປະຊຸມປະຈໍາເດືອນຂອງລັດຖະບານ ທີ່ຈະຈັດຂຶ້ນໃນວັນທີ 23 ເມສາ 2020 ທີ່ຈະມາເຖິງນີ້.
ກະຊວງແຮງງານ ແລະ ສະຫວັດດີການສັງຄົມ (ຮສສ) ໄດ້ສະເໜີໃຫ້ລັດຖະບານພິຈາລະນາຊ່ວຍຜູ້ອອກແຮງງານ ຜູ້ທີ່ເປັນສະມາຊິກກອງທຶນປະກັນສັງຄົມ ຫຼື ຜູ້ອອກແຮງງານ ທີ່ຢູ່ໃນລະບົບປະກັນສັງຄົມ ໃນພາກວິສາຫະກິດ ທີ່ຖືກສັ່ງໃຫ້ຢຸດກິດຈະການເນື່ອງຈາກການລະບາດຂອງພະຍາດ ໂຄວິດ-19 ທີ່ບໍ່ໄດ້ຮັບເງິນເດືອນ ຫຼື ຄ່າແຮງງານແຕ່ຍັງຢູ່ໃນຖານະເປັນຜູ້ປະກັນຕົນຕາມກົດໝາຍວ່າດ້ວຍປະກັນສັງຄົມ ຜູ້ລະ 500,000 ກີບ/ເດືອນ ໃນໄລຍະ 2 ເດືອນ (ເດືອນພຶດສະພາ ແລະ ເດືອນມີຖຸນາ 2020) ເຊີ່ງແມ່ນເງິນຂອງລັດ ເພື່ອແກ້ໄຂຜົນກະທົບຈາກໂຄວິດ-19, ສ່ວນກອງທຶນປະກັນສັງຄົມແມ່ນຈະປະຕິບັດຕາມເງື່ອນໄຂການອຸດໜູນປະກັນສັງຄົມ.
ຮຽບຮຽງຂ່າວ: ພຸດສະດີ