ນັກວິໄຈຈາກມະຫາວິທະຍາໄລ ເຄມບຣິດ ໃນສະຫະລາຊະອະນາຈັກ (ອັງກິດ) ນໍາໂດຍ ດຣ ປີເຕີ ຟອສເຕີ ນັກວິທະຍາສາດດ້ານພັນທຸກໍາເຜີຍວ່າ ການສຶກສາຍີນ ຂອງໄວຣັດໂຄໂຣນາສາຍພັນໃໝ່ 2019 ທີ່ກຳລັງລະບາດທົ່ວໂລກ ພົບວ່າໄວຣັສດັ່ງກ່າວກາຍເປັນ 3 ຊະນິດ.
ໄວຣັສໂຄໂຣສາຍພັນໃໝ່ຊະນິດ ເອ ນັ້ນເປັນໄວຣັສດັ້ງເດີມທີ່ແຜ່ຈາກ ໂຕເຈຍ ມາສູ່ມະນຸດ ຜ່ານໂຕລິ່ນ ແຕ່ບໍ່ແມ່ນຊະນິດທີ່ພົບທົ່ວໄປໃນໝູ່ຄົນເຈັບໃນປະເທດຈີນ ແຕ່ໄວຣັດທີ່ລະບາດໃນຈີນຫຼາຍທີ່ສຸດກັບເປັນຊະນິດ ບີ. ຜົນວິເຄາະຍັງລະບຸອີກວ່າ ໄວຣັດຊະນິດ ເອ ນັ້ນ ພົບຫຼາຍໃນປະເທດ ອົດສະຕຣາລີ ແລະ ພື້ນທີ່ຝັ່ງຕາເວັນຕົກຂອງສະຫະລັດ ທີ່ມີຜູ້ປ່ວຍລວມກັນແລ້ວຫຼາຍກວ່າ 400.000 ຄົນ ແລະ ຖ້າຫາກນັບສະເພາະໃນສະຫະລັດ ພົບວ່າ ຄົນເຈັບກຸ່ມຕົວຢ່າງເຖິງ 2 ໃນ 3 ຕິດໄວຣັສໂຄໂຣນາສາຍພັນໃໝ່ຊະນິດ ເອ.
ໄວຣັສໂຄໂຣສາຍພັນໃໝ່ຊະນິດ ບີ ກາຍພັນມາຈາກຊະນິດ ເອ ແລະ ດັ່ງທີ່ກ່າວມາຂ້າງເທິງນັ້ນຄື ເປັນໄວຣັດທີ່ພົບຫຼາຍທີ່ສຸດໃນຈີນ ທັງຍັງພົບວ່າ ຄົນເຈັບສ່ວນໃຫຍ່ໃນເອີຣົບ ເຊັ່ນ ສະຫະລາຊະອານາຈັກ, ສະວິດເຊີແລນ, ເຢຍລະມັນ, ຝຣັ່ງ, ແບນຊິກ ແລະ ເນເທີ້ແລນ ຍັງຕິດໄວຣັສຊະນິດ ບີ ອີກດ້ວຍ.
ໄວຣັສໂຄໂຣສາຍພັນໃໝ່ຊະນິດ ຊີ ຫຼື ໄວຣັສຊະນິດທີ 3 ກາຍພັນມາຈາກໄວຣັສ ຊະນິດ ບີ ອີກເທື່ອໜຶ່ງ ໂດຍເປັນໄວຣັສທີ່ພົບຫຼາຍທີ່ສຸດໃນຄົນເຈັບຊາວອິຕາລີ ເຊື່ອວ່າໜ້າຈະແຜ່ເຂົ້າມາໃນປະເທດດັ່ງກ່າວຈາກຈີນ ຜ່ານ ສິງກະໂປ.
ນັກວິໄຈເຊື່ອວ່າ ການກາຍພັນດັ່ງກ່າວເກີດຂຶ້ນເພື່ອໃຫ້ໄວຣັດຕໍ່ສູ້ກັບພູມຄຸ້ມກັນຂອງມະນຸດທີ່ມີຄວາມແຕກຕ່າງກັນອອກໄປ. ເຖິງຢ່າງໃດກໍຕາມ, ການສຶກສານີ້ຍັງບໍ່ໄດ້ຮັບການຍອມຮັບໃນໝູ່ນັກວິທະຍາສາດຮ່ວມວົງການ ເນື່ອງຈາກໃຊ້ຕົວຢ່າງຄົນເຈັບທົ່ວໂລກພຽງ 160 ຕົວຢ່າງເທົ່ານັ້ນ, ແຕ່ທີມວິໄຈນີ້ ເພີ່ມຕົວຢ່າງການສຶກສາມາເປັນຫຼາຍກວ່າ 1.000 ຕົວຢ່າງ ເມື່ອທ້າຍເດືອນມີນາທີ່ຜ່ານມາ ເພື່ອໃຫ້ໄດ້ຂໍ້ມູນທີ່ຊັດເຈນຍິ່ງຂຶ້ນ ແຕ່ຍັງບໍ່ຜ່ານຂັ້ນຕອນການກວດສອບຜົນງານໂດຍຜູ້ຊ່ຽວຊານພາຍໃນ.
ຮຽບຮຽງໂດຍ: ລັດສະໝີ