ຫ້ອງການບໍລິຫານງານສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ໄດ້ອອກໜັງສືແຈ້ງການ ໃນວັນທີ 7 ເມສາ 2020 ກ່ຽວກັບການໃຫ້ງົດ ປະເພນີຮົດສົງພຣະປີໃໝ່ລາວ ເພື່ອບໍ່ໃຫ້ມີການຊຸມນຸມຂອງມວນຊົນ.
ເນື່ອງຈາກສະຖານະການໃນປັດຈຸບັນພະຍາດໂຄວິດ-9 (COVID-19) ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ສຳລັບຢູ່ ສປປ ລາວ ເຖິງແມ່ນວ່າລັດຖະບານ ໄດ້ມີມາດຕະການສະກັດກັ້ນ ແລະກັນການແຜ່ລະບາດພະຍາດນີ້ຢ່າງຈິງຈັງ ໃນໄລຍະທີ່ຜ່ານ ມາແຕ່ມາເຖິງໃນປັດຈຸບັນ ກໍ່ໄດ້ກວດພົບຜູ້ຕິດເຊື້ອຢູ່ ແລະ ມີຄວາມສ່ຽງທີ່ຈະແຜ່ລະບາດ ໃນທົ່ວປະເທດ.
ດັ່ງນັ້ນ ເພື່ອປະຕິບັດຕາມຄຳສັ່ງ ຂອງນາຍົກລັດຖະມົນຕີ ໃນການຍົກລະດັບການສະກັດກັ້ນ ແລະກັນ ການລະບາດ ບໍ່ໃຫ້ແຜ່ລາມອອກໄປໄວ ແລະ ເປັນວົງກວ້າງ ພ້ອມທັງເປັນບ່ອນອີງໃຫ້ພຣະສົງ ສາມະເນນ ພຸດທະສາສະນິກະຊົນລາວບັນດາເຜົ່າ ໄດ້ຈັດຕັ້ງປະຕິບັດຢ່າງເປັນເອກະພາບ ມີປະສິດທິພາບ ແລະ ປະສິດທິຜົນ ຈຶ່ງນະມັດສະການແຈ້ງການມາຍັງພຣະຫຼັກຄຳ ໄດ້ນຳພາ ແລະ ແຈ້ງການລົງໄປຫາ ອພສ ເມືອງ, ເຂດ ແລະ ວັດ ເພື່ອໃຫ້ພຣະສົງ-ສາມະເນນ ພຸດທະສາສະນິກະຊົນ ພາຍໃນແຕ່ລະວັດ ບ້ານຂອງຕົນ ໄດ້ງົດການຈັດງານບຸນ ປະເພນີຮົດສົງພຣະປີໃໝ່ລາວ ເພື່ອບໍ່ໃຫ້ມີການຊຸມນຸມຂອງມວນຊົນ ຂໍໃຫ້ພຣະສົງພາຍໃນວັດແຕ່ລະວັດ ເຮັດພິທີຮົດສົງພຣະພຸດທະຮູບ ຕາມຮີດຄອງປະເພນີເລັກນ້ອຍເທົ່ານັ້ນ.
ຮຽບຮຽງຂ່າວ: ພຸດສະດີ