ໃນວັນທີ 1 ເມສາ 2020ນີ້ ເຈົ້າໜ້າທີ່ຕຳຫຼວດຈັບຜູ້ກໍ່ເຫດທຳຮ້າຍຮ່າງກາຍຊາຍສູງອາຍຸເສຍຊີວິດທີ່ສວນປະຕູໄຊໄດ້ຮຽບຮ້ອຍ ເຊິ່ງຜູ້ກໍ່ເຫດຊື່ ທ້າວ ໄຊ ວຽງໄຊ ຫຼື ເງິນ 45 ປີ ຢູ່ບ້ານບໍ່ໂອ ເມືອງຫາດຊາຍຟອງ ນວ ເຄີຍໄປຢູ່ໄທ ຈັງຫວັດພິຈິດ ແລະ ເຄີຍຕີມວຍໄທ ປະມານ30 ກວ່າຄັ້ງ ພໍ່ເປັນຄົນລາວ ແມ່ເປັນຄົນໄທ (ເສຍຊີວິດໝົດແລ້ວ) ຜູ້ກ່ຽວຍອມຮັບສາລະພາບວ່າ ໄດ້ເຕະກ້ານຄໍ ທ ສີສະໝຸດ ທີ່ເສຍຊີວິດຢູ່ປະຕູໄຊແທ້. ສ່ວນຄຳໃຫ້ການຕ່າງໆ ແລະ ສາເຫດຈູງໃຈໃນການກໍ່ເຫດຈະລາຍງານໃຫ້ທ່ານຊາບ ຫຼັງຈາກເຈ້າໜ້າທີ່ສືບສວນຄາດຕະກອນສຳເລັດແລ້ວ.
ທ່ານຫົວໜ້າຫ້ອງຕຳຫຼວດ ກອງບັນຊາການ ປກສ ນະຄອນຫຼວງວຽງຈັນ ໃຫ້ຮູ້ອີກວ່າ: ໃນວັນທີ 30 ມີນາ 2020 ເວລາ 6:00 ໂມງ ເຈົ້າໜ້າທີ່ຕໍາຫຼວດພະແນກສືບສວນ-ສອບສວນ ໄດ້ຮັບແຈ້ງຄວາມວ່າ: ມີຄົນເສຍຊີວິດຢູ່ສວນປະຕູໄຊ ຈຶ່ງໄດ້ສົມທົບກັບພາກສ່ວນກ່ຽວຂ້ອງ ລົງກວດກາຊັນນະສູດສະຖານທີ່ເກີດເຫດ, ຈຶ່ງຮູ້ໄດ້ວ່າຜູ້ເສຍຊີວິດຊື່ ທ້າວ ສີສະໝຸດ ອາຍຸ 55 ປີ ສັນຊາດລາວ ເກີດຢູ່ບ້ານ ຫີນຊີ່ວ ເມືອງ ຄົງເຊໂດນ ແຂວງສາລະວັນ ຜູ້ກ່ຽວໄດ້ມາພັກເຊົາຢູ່ນຳເອື້ອຍ ຢູ່ບ້ານ ໂພນທັນເໜືອ ເມືອງ ໄຊເສດຖາ ນະຄອນຫຼວງວຽງຈັນ. ຈາກນັ້ນ, ຈຶ່ງໄດ້ນຳສົ່ງສົບຂອງຜູ້ເສຍຊີວິດ ໄປໄວ້ໂຮງໝໍມະໂຫສົດ.
ຜ່ານການກວດກາຊັນນະສູດຂອງທີມແພດ ພົບເຫັນວ່າ: ຫົວເບື້ອງຊ້າຍຂອງຜູ້ກ່ຽວໄຄ່ບວມຂະໜາດ 2,5×4 cm ແລະ ມີຮ່ອງຮອຍໜັງເລີ້ນຢູ່ບ່າໄລ່ເບື້ອງຊ້າຍ ຂະໜາດ 1×1,5 cm. ພາຍຫຼັງກວດກາຊັນນະສູດແລ້ວ ເຈົ້າໜ້າທີ່ໄດ້ສັນນິຖານວ່າ: ຜູ້ກ່ຽວເສຍຊີວິດຍ້ອນຖືກທຳຮ້າຍຮ່າງກາຍ ຫຼື ເກີດອຸບັດຕິເຫດ ລົ້ມຫົວນ໋ອກພື້ນ. ຈາກນັ້ນ, ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະ ລົງກວດກາເກັບກຳຂໍ້ມູນຢູ່ບໍລິເວນເກີດເຫດ, ຈຶ່ງໄດ້ຂໍ້ມູນຈາກກ້ອງວົງຈອນປິດຄື ໃນເວລາ 00:42 ນາທີ ແມ່ນເຫັນພາບຜູ້ກ່ຽວຖືກທຳຮ້າຍຮ່າງກາຍ ມີຄົນຮ້າຍເຕະເຂົ້າບໍລິເວນກ້ານຄໍ ເຮັດໃຫ້ຜູ້ກ່ຽວລົ້ມລົງຫົວກະທົບລົງໃສ່ພື້ນ ທີ່ປູດ້ວຍບ໋ອກ 6 ລ່ຽມ; ເຊິ່ງໃນຂະນະທີ່ເກີດເຫດ ໄດ້ມີຄົນເຫັນເຫດການ ແລະ ໄດ້ໂຊມເອົາຜູ້ກ່ຽວຂຶ້ນມານັ່ງໄວ້ເທິ່ງຕັ່ງຫີນ ແລ້ວເຫັນວ່າຜູ້ກ່ຽວໄດ້ສະຕິ. ຈາກນັ້ນ, ຜູ້ທີ່ໃຫ້ຄວາມຊ່ວຍເຫຼືອ ກໍ່ໄດ້ອອກຈາກບໍລິເວນເກີດເຫດໄປ. ດັ່ງນັ້ນ, ຈຶ່ງຂໍຢັ້ງຢືນວ່າ: ເຫດການເສຍຊີວິດຄັ້ງນີ້ ແມ່ນຍ້ອນຜູ້ກ່ຽວຖືກທຳຮ້າຍຮ່າງກາຍຈົນເສຍຊີວິດ ບໍ່ແມ່ນຍ້ອນພະຍາດໂຄວິດ-19 ດັ່ງທີ່ສື່ອອນລາຍບາງສື່ເວົ້າແຕ່ປະການໃດ, ປັດຈຸບັນສົບຂອງຜູ້ກ່ຽວ ແມ່ນໄດ້ມອບໃຫ້ຍາດພີ່ນ້ອງ ໄປທຳພິທີຕາມສາສະໜາເປັນທີ່ຮຽບຮ້ອຍແລ້ວ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: ປ້ອງກັນຄວາມສະຫງົບ ນະຄອນຫຼວງວຽງຈັນ