ສຳນັກຂ່າວຕ່າງປະເທດລາຍງານຈາກປະເທດສິງກະໂປ ເມື່ອວັນທີ 27 ມີນາ ນີ້ວ່າ ກະຊວງສາທາລະນະສຸກ ສິງກະໂປ ອອກຖະແຫຼງການເມື່ອອາທິດທີ່ຜ່ານມາວ່າ ທາງໜ່ວຍງານພາກລັດໄດ້ຍົກລະດັບມາດຕະການປ້ອງກັນການແຜ່ລະບາດຂອງເຊື້ອໄວຣັດໂຄວິດ-19 ເຊິ່ງໄດ້ປະຕິບັດຕາມກົດໝາຍວ່າດ້ວຍໂຣກຕິດຕໍ່ ແລະ ເພື່ອໃຫ້ເປັນໄປຕາມທິດທາງປະຕິບັດກ່ຽວກັບໄລຍະຫ່າງທາງສັງຄົມ ທີ່ກຳນົດໂດຍຄະນະສະເພາະກິດພິເສດລະຫວ່າງກະຊວງ ຖ້າຫາກບຸກຄົນໃດບໍ່ປະຕິບັດຕາມຂໍ້ກຳນົດກ່ຽວກັບໄລຍະຫ່າງທາງສັງຄົມ ຈະມີໂທດຈຳຄຸກສູງສຸດ 6 ເດືອນ ປັບເງິນສູງສຸດ 10.000 ໂດລາສິງກະໂປ ຫຼື ທັງຈຳທັງປັບ ແລະ ໃນຂະນະຜູ້ທີ່ລະເມີດຕໍ່ຄຳສັ່ງໃຫ້ກັກຕົວໃນເຮືອນເປັນເວລາ 14 ວັນ ຕ້ອງໄດ້ຮັບການລົງໂທດໃນລະດັບດຽວກັນ ລະບຽບນີ້ແມ່ນຈະໃຊ້ກັບຄົນສິງກະໂປ ແລະ ຄົນຕ່າງຊາດທີ່ອາໃສໃນສິງກະໂປ.
ທັງນີ້, ການຮ່ວມກຸ່ມສຶກສາ ຫຼື ເຮັດວຽກໃນສຳນັກງານຕ້ອງບໍ່ໃຫ້ເກີນ 10 ຄົນ ແລະ ແຕ່ລະຄົນຕ້ອງຢູ່ຫ່າງກັນບໍ່ຕໍ່າກວ່າ 1 ແມັດ ໃນຊຸບເປີມາເກັດ, ຫ້າງຊັບພະສິນຄ້າ ແລະ ຮ້ານອາຫານ ຫາກຕ້ອງມີການຕໍ່ແຖວຊື້ເຄື່ອງ ຫຼື ຊຳລະເງິນ ທາງເຈົ້າຂອງຫ້າງຮ້ານຕ້ອງຈັດສັນໃຫ້ມີໄລຍະຫ່າງບໍ່ຕໍ່າກວ່າ 1 ແມັດ ຫາກບໍ່ປະຕິບັດຕາມຕ້ອງຮັບໂທດທາງກົດໝາຍເຊິ່ງມີບົດລົງໂທດສູງສຸດແບບດຽວກັບຜູ້ທີ່ຝ່າຝືນເລື່ອງໄລຍະຫ່າງທາງສັງຄົມ.
ປັດຈຸບັນ, ສິງກະໂປມີຜູ້ປ່ວຍສະສົມຈາກໂຣກໂຄວິດ-19 ໃນປະເທດຢ່າງໜ້ອຍ 683 ກໍລະນີ ຮັກສາຫາຍແລ້ວ 172 ກໍລະນີ ແລະ ເສຍຊີວິດ 2 ກໍລະນີ ເປັນຜູ້ສູງອາຍຸຄົນສິງກະໂປ 1 ຄົນ ແລະ ຄົນອິນໂດເນເຊຍ 1 ຄົນ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.dailynews.co.th