ໂຄວິດ-19 ໄດ້ສ້າງຜົນກະທົບຢ່າງໃຫຍ່ຫຼວງຕໍ່ເສດຖະກິດໃນທົ່ວໂລກ ໂດຍສະເພາະທຸລະກິດການບໍລິການຂອງສາຍການບິນຕ່າງໆ, ທຸລະກິດການບິນໃນປະເທດລາວເຮົາກໍໄດ້ຮັບຜົນກະທົບເຊັ່ນດຽວກັນ. ຖ້ຽວບິນຕ່າງປະເທດຫຼາຍເສັ້ນບິນໂດຍສານການບິນລາວໄດ້ຖືກຍົກເລີກ ແລະ ຈໍານວນຜູ້ໂດຍສານກໍຍິ່ງນັບມື້ໜ້ອຍລົງ ເຮັດໃຫ້ພະນັກງານທຸກຄົນຕັ້ງແຕ່ລະດັບວິຊາການຈົນເຖິງຂັ້ນບໍລິຫານ ຕ້ອງຮ່ວມມືຮ່ວມໃຈຜ່ານວິກິດການຄັ້ງນີ້ນໍາກັນໃຫ້ໄດ້.
ການບິນລາວໄດ້ມິການລະດົມໃຫ້ພະນັກງານພັກວຽກຢ່າງສະໝັກໃຈ ເພື່ອຊ່ວຍຫຼຸດພາລະຄ່າໃຊ້ຈ່າຍໃນການຈ່າຍເງິນເດືອນ ໂດຍບໍ່ມີການບັງຄັບພະນັກງານ ໃຫ້ພັກງານໂດຍບໍ່ເຕັມໃຈ. ພະນັກງານການບິນລາວຄົນໜຶ່ງໄດ້ກ່າວວ່າ: “ບໍລິສັດ ກໍຖືວ່າເປັນອູ່ເຂົ້າອູ່ນໍ້າຂອງເອື້ອຍ ໃນຊ່ວງວິກິດການນີ້ ກໍມີຄວາມເຫັນໃຈກັນ, ເອື້ອຍເອງກໍສະໝັກໃຈພັກ ເພື່ອເປັນອີກໜຶ່ງກຳລັງແຮງຊ່ວຍບໍລິສັດຫຼຸດຄ່າໃຊ້ຈ່າຍ”.
ນອກຈາກວ່າພະນັກງານທຸກພະແນກການໃນການບິນລາວ ຮ່ວມແຮງຮ່ວມໃຈກັນລາພັກບໍ່ຮັບເງິນເດືອນດ້ວຍຄວາມສະໝັກໃຈຕາມຄວາມສາມາດຂອງຕົນແລ້ວ, ທ່ານຜູ້ອຳນວຍການໃຫຍ່ກໍຂໍບໍ່ຮັບເອົາເງິນເດືອນເປັນເວລາ 3 ເດືອນ ແຕ່ຍັງມາເຮັດວຽກປົກກະຕິ. ສ່ວນຄະນະອຳນວຍການ ກໍຍິນດີສະໝັກໃຈ ບໍ່ຮັບເອົາເງິນເດືອນເປັນເວລາ 1 ເດືອນ ແລະ ຍັງມາເຮັດວຽກປົກກະຕິເຊັ່ນດຽວກັນ, ຄະນະພະແນກ ຫຼື ທຽບເທົ່າ, ຄະນະສາຂາທັງພາຍໃນ ແລະ ຕ່າງປະເທດ ສະໝັກໃຈລາພັກບໍ່ຮັບເງິນເດືອນ ເປັນຈຳນວນ 15 ວັນ. ຂໍຊົມເຊີຍໃນນໍ້າໃຈອັນງົດງາມຂອງທັງພະນັກງານທຸກຄົນທີ່ຮ່ວມແຮງ ຮ່ວມໃຈກັນ ເພື່ອໃຫ້ຜ່ານວິກິດຄັ້ງນີ້ໄປໃຫ້ໄດ້