The Straits Times ລາຍງານໃຫ້ຮູ້ວ່າປະທານາທິບໍດີຟິລິບປິນ ທ່ານ ໂຣດຣິໂກ ດູເຕີເຕ ຈະເຂົ້າຮັບການກວດຫາເຊື້ອໄວຣັສໂຄໂຣນາ ຫຼື ໂຄວິດ-19 (Covid-19) ໃນວັນທີ 12 ມີນາ 2020 ນີ້ ຫຼັງຈາກລັດຖະມົນຕີກະຊວງ 3 ທ່ານ ແລະ ສະມາຊິກສະພາສູງສອງທ່ານ ກ່າວວ່າພວກເຂົາໄດ້ຕິດຕໍ່ພົວພັນກັບຜູ້ທີ່ຕິດເຊື້ອ.
ສະມາຊິກສະພາສູງທ່ານ ບອງໂກ (Bong Go), ຜູ້ທີ່ຍັງເຮັດໜ້າທີ່ເປັນຜູ້ຊ່ວຍເຫຼືອທີ່ໃກ້ທີ່ສຸດຂອງທ່ານ ດູເຕີເຕ ບໍ່ໄດ້ກ່າວເຖິງເຫດຜົນທີ່ທ່ານ ດູເຕີເຕ ຕັດສິນໃຈທົດສອບຕົວເອງ ຫຼືວ່າ ລາວຈະວາງຕົວເອງຢູ່ພາຍໃຕ້ການກັກກັນ.
ສິ່ງນີ້ເກີດຂື້ນ ໃນຂະນະທີ່ກະຊວງສາທາລະນະສຸກຂອງຟິລິບປິນ ໄດ້ຢືນຢັນວ່າມີແມ່ຍິງອາຍຸ 67 ປີຄົນໜຶ່ງ ໄດ້ເສຍຊີວິດຢູ່ໂຮງໝໍ ໃນນະຄອນຫຼວງ ມະນິລາ, ເຊິ່ງເປັນຄົນຟີລິບປິນຄົນທຳອິດທີ່ເສຍຊີວິດຈາກການຕິດເຊື້ອ ໂຄວິດ-19, ເຊິ່ງເປັນໂຣກທີ່ເກີດຈາກເຊື້ອໄວຣັສ ແລະ ການເສຍຊີວິດຂອງນາງແມ່ນການເສຍຊີວິດຄັ້ງທີສອງທີ່ບັນທຶກໃນຟີລິບປິນ. ເນື່ອງຈາກວ່າມີນັກທ່ອງທ່ຽວຊາວຈີນຜູ້ໜຶ່ງ ທີ່ມາປະເທດຟີລິບປິນ ໄດ້ເສຍຊີວິດຢູ່ໂຮງໝໍລັດແຫ່ງໜຶ່ງ ໃນເດືອນມັງກອນທີ່ຜ່ານ, ເຊິ່ງນັ້ນເປັນການເສຍຊີວິດຄັ້ງທຳອິດທີ່ບັນທຶກຢູ່ນອກແຜ່ນດິນໃຫຍ່ຈີນ ແລະ ປັດຈຸບັນ ຟິລິບປິນມີຍອດຜູ້ຕິດເຊື້ອໂຄວິດ-19 ໃນປະເທດລວມມີ 6 ຄົນ.
ຮຽບຮຽງຂ່າວ: ພຸດສະດີ