ປະທານາທິບໍດີ ໂດນັລ ທຣໍ້າ ຂອງສະຫະລັດອາເມລິກາ ໄດ້ປະກາດມາດຕະການດ່ວນລະງັບການເດີນທາງທັງໝົດຈາກເອີຣົບເຂົ້າອາເມລິກາ ຍົກເວັ້ນເດີນທາງຈາກອັງກິດ ເບື້ອງຕົ້ນເປັນເວລາ 30 ວັນ ເພື່ອເປັນການສະກັດກັ້ນການແຜ່ລະບາດຂອງໄວຣັສໂຄວິດ-19 ໂດຍມາດຕະການນີ້ຈະມີຜົນບັງຄັບໃຊ້ທັນທີໃນຄໍ່າຄືນຂອງວັນສຸກທີ 13 ມີນາ 2020 ນີ້.
ທ່ານ ໂດນັລ ທຣໍ້າ ໄດ້ລະບຸວ່າ: ເຖິງແມ່ນວ່າມາດຕະການດັ່ງກ່າວຈະເປັນມາດຕະການທີ່ຮຸນແຮງແຕ່ກໍ່ຈຳເປັນຕ້ອງເຮັດ ເພື່ອສະກັດກັ້ນບໍ່ໃຫ້ຜູ້ຕິດເຊື້ອລາຍໃໝ່ເຂົ້າມາໃນສະຫະລັດເພີ່ມ ຫຼັງຈາກມີຍອດຜູ້ຕິດເຊື້ອໃນເອີຣົບເພີ່ມຂຶ້ນ ແລະ ຍັງບໍ່ສາມາດຄວບຄຸມໄດ້ ແຕ່ມາດຕະການນີ້ບໍ່ໄດ້ລວມເຖິງປະເທດອັງກິດ.
ມາດຕະການດັ່ງກ່າວໄດ້ເກີດຂຶ້ນຫຼັງຈາກອົງການອະນາໄມໂລກໄດ້ມີການປະກາດຍົກລະດັບໃຫ້ການລະບາດຂອງໂຄວິດ-19 ເປັນການລະບາດໃຫຍ່ລະດັບໂລກ (Pandemic) ເມື່ອຄືນຂອງວັນທີ 11 ມີນາທີ່ຜ່ານມາ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.sanook.com