ເມື່ອວັນທີ 5 ມີນາ 2020 ທີ່ຜ່ານມາ ເວັບໄຊ້ Mothership.sg ລາຍງານວ່າ ໃນໂລກໂຊຊຽວປະເທດຈີນໄດ້ແຊຣ໌ເລື່ອງລາວຂອງສາວຊາວຈີນຄົນໜຶ່ງທີ່ມີຊື່ວ່າ ນາງ ຫຼີ ເກີດຄວາມວິຕົກກັງວົນໃນສະຖານະການ ໂຄວິດ-19 ທີ່ແຜ່ລະບາດຢ່າງຮຸນແຮງ ນາງຈຶ່ງໄດ້ນຳທະນະບັດຈຳນວນ 3.000 ຢວນ ໄປໃສ່ໃນໄມໂຄເວບ ເພື່ອຈະຂ້າເຊື້ອ.
ຕາມການລາຍງານລະບຸວ່າ ນາງ ຫຼີ ມີຄວາມເຊື່ອວ່າ ຄວາມຮ້ອນຂອງໄມໂຄຣເວບຈະຊ່ວຍຂ້າເຊື້ອໄດ້ ເຊິ່ງນາງເອງກໍ່ບໍ່ຮູ້ຜົນແນ່ນອນວ່າມັນຈະຊ່ວຍຂ້າເຊື້ອໄດ້ແທ້ ຫຼືບໍ່ ແຕ່ສິ່ງທີ່ແນ່ນອນຄື ທະນະບັດຂອງນາງຫຼັງນຳອອກມາຈາກໄມໂຄເວບ ມັນໄດ້ໄໝ້ກອບໝົດສະພາບຮຽບຮ້ອຍ. ແຕ່ຖືວ່າຍັງໂຊກດີທີ່ທະນະບັດຂອງນາງ ຫຼີ ເຖິງແມ່ນວ່າຈະໄໝ້ເສຍຫາຍ ແຕ່ທາງທະນາຄານກໍ່ຍັງຮັບແລກທະນະບັດໃໝ່ທີ່ສະອາດປອດເຊື້ອໃຫ້ກັບນາງ ເຊິ່ງທາງຕົວແທນທະນາຄານເຜີຍກັບສື່ທ້ອງຖິ່ນວ່າ ທາງທະນາຄານ ແລະ ສະຖາບັນການເງິນມີຂະບວນການຂ້າເຊື້ອ ໂດຍໃຊ້ແສງອັລຕຣ້າໄວໂອເລດທີ່ມີອຸນຫະພູມສູງ ຈຶ່ງໝັ້ນໃຈໄດ້ວ່າ ທະນະບັດທີ່ອອກໄປນັ້ນປອດໄພແທ້.