ຕຳຫຼວດຟິລິບປິນຫຼາຍຄົນຖືກສົ່ງຕົວເຂົ້າໄປປະຕິບັດການບໍລິເວນສູນການຄ້າວີມອລ ໃນເມືອງ ຊານຮວນ ນະຄອນຫຼວງມະນີລາ ໃນວັນທີ 2 ມີນາ ຫຼັງຈາກເກີດເຫດການຄົນຮ້າຍຈັບຕົວປະກັນ ແລະ ມີການກາດຍິງພາຍໃນສູນການຄ້າດັ່ງກ່າວ.
ຜູ້ກໍ່ເຫດກາດຍິງຄັ້ງນີ້ມີຊື່ວ່າ ທ້າວ ອາຣ໌ຊີ ພາເຣ ອະດີດພະນັກງານຮັກສາຄວາມປອດໄພຂອງຫ້າງ ໄວອາຍຸ 32 ປີ ເຊິ່ງຫາກໍ່ຖືກໄລ່ອອກເມື່ອອາທິດທີ່ຜ່ານມາ ຍ້ອນຄວາມຄຽດແຄ້ນຈຶ່ງໄດ້ກໍ່ເຫດ.
ທ່ານ ຟຣັງຊິສ ຊາໂມຣາ ເຈົ້າເມືອງເມືອງ ຊາຍຮວນ ເປີດເຜີຍວ່າ ຄົນຮ້າຍທີ່ກໍ່ເຫດເຄີຍເປັນພະນັກງານຮັກສາຄວາມປອດໄພທີ່ຖືກບໍລິສັດຕົ້ນສັງກັດໄລ່ອອກ ເຊິ່ງບໍລິສັດດັ່ງກ່າວໄດ້ຮັບຜິດຊອບຮັກສາຄວາມປອດໄພໃຫ້ກັບສູນການຄ້າແຫ່ງນີ້ ແລະ ຄົນຮ້າຍໄດ້ຈັບພະນັກງານຂອງສູນການຄ້າ ດັ່ງກ່າວປະມານ 30 ຄົນ ເປັນຕົວປະກັນ ແລະ ຖືກຍິງເສຍຊີວິດຢ່າງໜ້ອຍ 1 ຄົນ.
ທ່ານເຈົ້າເມືອງໄດ້ກ່າວວ່າຄົນຮ້າຍມີອາວຸດປືນ ແລະ ລະເບີດມາພ້ອມ, ຜູ້ກໍ່ເຫດໄດ້ຍື່ນເງື່ອນໄຂ 2 ຂໍ້ ຄື: ຕ້ອງການລົມກັບເພື່ອນຮັກສາຄວາມປອດໄພ ທີ່ເຄີຍເຮັດວຽກນຳກັນ ແລະ ຕ້ອງການລົມກັບສື່ມວນຊົນ ໂດຍເຈົ້າໜ້າທີ່ໄດ້ອະນຸຍາດໃຫ້ຜູ້ກໍ່ເຫດລົມກັບເພື່ອນຜ່ານ Video Call ໂດຍເຂົາໂນ້ມນ້າວໃຫ້ເພື່ອນມາຮ່ວມກັນກໍ່ເຫດ ໂດຍອ້າງວ່າ ເພື່ອເປັນການຕໍ່ຕ້ານຍຶດອຳນາດຈາກຝ່າຍບໍລິຫານຫ້າງ, ສ່ວນເງື່ອນໄຂຂໍ້ທີ 2 ແມ່ນຂໍພົບສື່ ເຈົ້າໜ້າທີ່ເປີດໂອກາດໃຫ້ຜູ້ກໍ່ເຫດໄດ້ເວົ້າ ກ່ອນຄົນຮ້າຍຈະຖືກຈັບກຸມຕົວ ແລະ ຕົວປະກັນໄດ້ຖືກປ່ອຍຕົວທັງໝົດ.
ຮຽບຮຽງຂ່າວ: ພຸດສະດີ