ໜັງສືພິມວຽງຈັນໃໝ່ລາຍງານເມື່ອວັນທີ 2 ມີນາ 2020 ວ່າ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ໄດ້ອອກແຈ້ງການໃຫ້ພິຈາລະນາການເລື່ອນ ຫຼື ໂຈະການໄປປະຕິບັດວຽກງານຂອງພະນັກງານລັດຖະກອນຢູ່ປະເທດທີ່ມີການລະບາດຂອງພະຍາດ ໂຄວິດ-19.
ອີງຕາມແຈ້ງການ ສະບັບເລກທີ 003/ສພກ ລົງວັນທີ 2 ມີນາ 2020 ຂອງຄະນະສະເພາະກິດ ດັ່ງກ່າວ ເຊິ່ງໄດ້ສະເໜີໃຫ້ພາກສ່ວນຕ່າງໆ ພິຈາລະນາ ການອະນຸມັດໃຫ້ພະນັກງານເດີນທາງໄປປະຕິບັດງານຢູ່ບັນດາປະເທດ ທີ່ມີການລະບາດຂອງພະຍາດ ໂຄວິດ-19. ຖ້າມີຄວາມຈໍາເປັນແທ້ ກໍ່ຕ້ອງປະຕິບັດຕາມມາດຕະການເຝົ້າລະວັງ ແລະ ປ້ອງກັນການຕິດເຊື້ອຕາມການແນະນໍາຂອງປະເທດເຈົ້າພາບຢ່າງເຂັ້ມງວດ ໂດຍສະເພາະການປ້ອງກັນຕົນເອງບໍ່ໃຫ້ຕິດເຊື້ອພະຍາດດັ່ງກ່າວ.
ການເດີນທາງໄປປະເທດທີ່ມີການລະບາດ ແມ່ນມີຄວາມສ່ຽງສູງໃນການຕິດເຊື້ອ ແລະ ຈະນໍາມາແຜ່ລະບາດໃນປະເທດເຮົາ ຍ້ອນວ່າປະຈຸບັນນີ້ ສປປ ລາວ ຍັງບໍ່ມີກໍລະນີຜູ້ຕິດເຊື້ອພະຍາດ ໂຄວິດ-19 ເທື່ອ.
ຮຽບຮຽງຂ່າວ: ພຸດສະດີ