ໜັງສືພິມວຽງຈັນທາມ ລາຍງານວ່າ ລາວໄດ້ຮຽກຮ້ອງໃຫ້ຜູ້ປະກອບການ ທຸລະກິນທ່ອງທ່ຽວໃຫ້ໂຈະການບໍລິການ ນໍາກຸ່ມນັກທ່ອງທ່ຽວ ຈາກ ສປປ ລາວ ໄປເຂດທີ່ມີການລະບາດຂອງພະຍາດອັກເສບປອດສາຍພັນໃໝ່ (COVID-19), ໂດຍສະເພາະປະເທດເກົາຫລີໃຕ້ ເນື່ອງມາຈາກຜູ້ຕິດເຊື້ອພະຍາດດັ່ງກ່າວຢູ່ເກົາຫລີໃຕ້ ເພີ່ມຂື້ນຢ່າງຫຼວງຫຼາຍ.
ຮສ ດຣ ພູທອນ ເມືອງປາກ ຮອງລັດຖະມົນຕີ ກະຊວງ ສາທາລະນະສຸກ ໄດ້ກ່າວໃນງານຖະແຫຼງຂ່າວຕໍ່ສື່ມວນຊົນ ໃນມື້ເຊົ້າ ວັນທີ 26 ກຸມພາ ວ່າ: ທາງການລາວແມ່ນໄດ້ເອົາໃຈໃສ່ ແລະ ມີຄວາມຫ່ວງໃຍ, ຈຶ່ງໄດ້ກຽມອອກໜັງສືແຈ້ງການ ເພື່ອແຈ້ງໃຫ້ບໍລິສັດທ່ອງທ່ຽວໂຈະການນໍາກຸ່ມນັກທ່ອງທ່ຽວເດີນທາງໄປເຂດທີ່ເກີດການລະບາດຂອງພະຍາດ COVID-19.
ລັດວິສາຫະກິດການບິນລາວຄາດວ່າຈະໂຈະຊົ່ວຄາວຖ້ຽວບິນ ວຽງຈັນ-ເຊອູນ ໃນເດືອນໜ້ານີ້ ເນື່ອງຈາກມີຜູ້ໂດຍສານໜ້ອຍ ໃນຕົ້ນເດືອນນີ້, ສາຍການບິນລາວກໍ່ໄດ້ໂຈະຊົ່ວຄາວຖ້ຽວບິນໄປຫຼາຍເມືອງຂອງຈີນ.
ຮຽບຮຽງຂ່າວ: ພຸດສະດີ