ການຫາເງິນແບບງ່າຍໆ ແລະບໍ່ອອກແຮງງານນັ້ນກໍ່ແມ່ນການໄປລັກຊັບຂອງເພິ່ນເພື່ອເອົາມາເປັນຂອງໂຕ ດັ່ງສານປະຊາຊົນແຂວງສະຫວັນນະເຂດຕັດສິນຄະດີລັກຊັບຂອງພົນລະເມືອງ ແລະຄ້າຂາຍຢາເສບຕິດໃນຫວ່າງມໍ່ໆນີ້ ຄືທ້າວ ພຸດ (ຈຳເລີຍ) ອາຍຸ 29 ປີສັນຊາດລາວ, ອາຊີບເຮັດນາ, ບ້ານປົ່ງດົງ ເມືອງອາດສະພັງທອງ ຖືກຫາວ່າລັກຊັບ (ງົວ) ຂອງພົນລະເມືອງ ແລະຄ້າຂາຍຢາເສບຕິດ (ຢາບ້າ).
ໃນວັນທີ 24 ກັນຍາ 2013 ເວລາປະມານ 16 ໂມງທ້າວ ພຸດ ໄດ້ອອກຈາກຖຽງຂອງທ້າວ ຍືນ ຜູ້ເປັນໝູ່ເພື່ອໄປຊອກຫາລັກຊັບ, ພໍຮອດບ້ານໜອງໃສ ໄດ້ເຫັນງົວແມ່ໂຕໜຶ່ງເຊີ່ງຜູກໄວ້ແຄມຖຽງນາເຊີ່ງເປັນງົວຂອງທ້າວ ບຸນເພັງ ແລ້ວໄດ້ລົງມືລັກຄົນດຽວ ຕໍ່ຈາກນັ້ນໄດ້ນຳເອົາໄປຂາຍໃຫ້ແກ່ນາງ ຈິດ ຊຶ່ງເປັນແມ່ຄ້າສັດ ແລະໄດ້ຂາຍງົວໂຕດັ່ງກ່າວໃນລາຄາ 10 ພັນບາດ (ສະກຸນເງິນໄທ), ຫຼັງຈາກຈຳເລີຍໄດ້ເງິນມາແລ້ວກໍ່ໄດ້ແບ່ງເງິນຈຳນວນ 5 ພັນບາດຮ່ວມທຶນກັບເງິນຂອງທ້າວ ຍືນ ໄປຊື້ຢາເສບຕິດ (ຢາບ້າ) ມາຂາຍຍ່ອຍເພື່ອເອົາກຳໄລ ໃນລາຄາ 10 ພັນບາດ/ຢາບ້າ 1 ຖົງ ແລະໄດ້ນຳມາແບ່ງກັນຄົນລະເຄິ່ງ, ຈາກນັ້ນຜູ້ກ່ຽວໄດ້ນຳເອົາຢາບ້າອອກຈຳໜ່າຍຂາຍໃຫ້ໄວໜຸ່ມທົ່ວໄປພາຍໃນບ້ານ ແລະບ້ານໃກ້ຄຽງ, ວັນທີ 30 ກັນຍາ 2013 ຈຳເລີຍໄດ້ໂທລະສັບໃຫ້ທ້າວ ຍືນ ເອົາຢາບ້າມາສົ່ງໃຫ້, ຂະນະທີ່ພວກກ່ຽວນັ່ງລົມກັນຢູ່ຖຽງນາໄດ້ພົບເຫັນເຈົ້າໜ້າທີ່ຕຳຫຼວດແລ້ວໄດ້ເອົາໂຕຫຼົບໜີໄປ, ຈົນຕົກມາຮອດວັນທີ 5 ຕຸລາ 2013 ຈຳເລີຍໄດ້ເຂົ້າມາມອບໂຕຕໍ່ເຈົ້າໜ້າທີ່.
ຄະດີດັ່ງກ່າວສານໄດ້ລົງໂທດຕັດອິດສາລະພາບທ້າວ ພຸດ (ຈຳເລີຍ) ໃນສະຖານລັກຊັບຂອງພົນລະເມືອງແລະຄ້າຂາຍຢາເສບຕິດ ຖືກຈຳຄຸກເປັນເວລາ 5 ປີ 6 ເດືອນ ແລະປັບໃໝເປັນເງິນຈຳນວນ 10 ລ້ານກວ່າກີບ.
ຂ່າວ-ພາບ: ພຸດທະສິນ ໜັງສືພິມສະຫວັນພັດທະນາ