ສຳນັກຂ່າວເດລີນິວ ລາຍງານເມື່ອວັນທີ 3 ກຸມພາ 2020 ວ່າ ຄະນະກຳມາທິການສາທາລະນະສຸກແຫ່ງ ສປ ຈີນ ລາຍງານເຖິງສະຖານະການຂອງເຊື້ອໄວຣັສໂຄໂຣນາສາຍພັນໃໝ່ ທີ່ແຜ່ລະບາດໃນປະເທດຕັ້ງແຕ່ເດືອນທັນວາ 2019 ຈົນຮອດປັດຈຸບັນມີຈຳນວນຜູ້ເສຍຊີວິດຢ່າງໜ້ອຍ 361 ຄົນ ແລະ ມີຜູ້ປ່ວຍຕິດເຊື້ອແລ້ວ 17,205 ຄົນ; ແຕ່ຄະນະທີມແພດໄດ້ຮ່ວມກັນຮັກສາຜູ້ປ່ວຍຕິດເຊື້ອຈົນປາສະຈາກໂຣກ ແລະ ສາມາດເດີນທາງກັບບ້ານໄດ້ແລ້ວ 475 ຄົນ.
ດ້ານສະຖານະການຕິດເຊື້ອໃນຕ່າງປະເທດພົບຜູ້ຕິດເຊື້ອທັງໝົດ 23 ປະເທດຄື: ໄທ, ຍີ່ປຸ່ນ, ສິງກະໂປ, ເກົາຫຼີໃຕ້, ສາຫະລັດ ອາຣັບ ເອມິເຣດ (ຢູເອອີ), ອິຕາລີ, ຣັດເຊຍ, ອັງກິດ, ກຳປູເຈຍ, ອິນເດຍ, ເນປານ, ຟິລິບປິນ, ສະເປນ, ສີລັງກາ ແລະ ສະວີເດນ ແລະ ຍັງມີລາຍງານວ່າໃນ ຟິລິປິນມີຜູ້ປ່ວຍຕິດເຊື້ອເສຍຊີວິດແລ້ວ 1 ຄົນ ເປັນນັກທ່ອງທ່ຽວຊາຍຊາວຈີນໄວອາຍຸ 44 ປີ ແລະ ຖືວ່າເປັນການເສຍຊີວິດນອກປະເທດຈີນລາຍທຳອິດ.
ໃນປະເທດຈີນເວລານີ້,ນອກຈາກຈະມີການແຜ່ລະບາດຂອງເຊື້ອໄວຣັສໂຄໂຣນາແລ້ວ ຍັງມີລາຍງານຂ່າວວ່າທີ່ເມືອງ ເຊົາຫຍາງ ແຂວງ ຫູໜານ ທີ່ມີຊາຍແດນຕິດກັບແຂວງ ຫູເປີ່ຍ ໄດ້ເກີດການແຜ່ລະບາດຂອງພະຍາດໄຂ້ຫວັດສັດປີກ ຫຼື H5N1 ຂຶ້ນ ສົ່ງຜົນໃຫ້ມີສັດປີກຕາຍຫຼາຍກວ່າ 4,500 ໂຕ ໂດຍທາງລັດຖະບານຈີນມີຄຳສັ່ງກຳຈັດສັດປີກໃນຟາມຕ່າງໆ ໂດຍສະເພາະໄກ່ກວ່າ 20,000 ໂຕ ເພື່ອລະງັບການແຜ່ລະບາດຂອງພະຍາດໄຂ້ຫວັດສັດປີກ.
ຮຽບຮຽງຂ່າວ: ພຸດສະດີ