ປະຊາຊົນລັກລອບເຂົ້າໄປຂຸດຫາແຮ່ທອງແດງພາຍໃນເຂດເໝືອງສຳປະທານທາງພາກຕາເວັນອອກສຽງໃຕ້ຂອງປະເທດດີອາຣຄອງໂກ ເປັນເຫດໃຫ້ອຸໂມງດິນ 2 ປ່ອງພັງຖະຫຼົ່ມເມື່ອວັນທີ 27 ມິຖຸນາຜ່ານມາຢູ່ເຂດໂຄລເວຊີ ແຂວງລູອາບາບາ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 43 ລາຍ ແຕ່ສຳນັກງານກາຊາດ ແລະ ກຸ່ມປ້ອງກັນໄພພົນລະເຮືອນທ້ອງຖິ່ນໄດ້ລະບຸວ່າໂຕເລກຂອງຜູ້ເສຍຊີວິດອາດສູງເຖິງ 60-80 ລາຍ.
ທັງນີ້ ການລາຍງານໂຕເລກຜູ້ເສຍຊີວິດຍັງບໍ່ເປັນທີ່ຊັດເຈນ ຂະນະທີ່ເຂດເໝືອງທີ່ປະຊາຊົນລັກລອບເຂົ້າໄປຂຸດແມ່ນເປັນພື້ນທີ່ສຳປະທານຂອງບໍລິສັດເໝືອງແຮ່ທອງແດງຄາໂມໂຕ ຄັອບເປີ ພຳພານີ ຫຼື ເຄຊີຊີ ເຄືອຂ່າຍຂອງບໍລິສັດເໝືອງແຮ່ຍັກໃຫຍ່ຂອງໂລກຄື ເກລນຄໍຣ ໃນປະເທດສະວິດເຊີແລນ.
ເບື້ອງຕົ້ນຖະແຫຼງການຂອງບໍລິສັດເກລນຄໍຣລະບຸວ່າ ມີຜູ້ເສຍຊີວິດ 19 ລານ ແຕ່ອາດມີຜູ້ເສຍຊີວິດຫຼາຍກວ່ານີ້ ຊຶ່ງໃນວັນທີ 28 ມິຖຸນາທີ່ເຈົ້າໜ້າທີ່ໄດ້ເປີດເຜີຍວ່າ ມີຜູ້ເສຍຊີວິດໃນເຫດການດັ່ງກ່າວຢ່າງໜ້ອຍ 43 ລາຍ ຂະນະທີ່ໜຶ່ງໃນຜູ້ບໍລິຫານຂອງບໍລິສັດດັ່ງກ່າວໄດ້ຮັບແຈ້ງຈາກຜູ້ບໍລິຫານເຄຊີຊີວ່າ ມີຊາວບ້ານບຸກລຸກເຂົ້າໄປລັກລອບຂຸດແຮ່ໃນເຂດບໍລິສັດເພີ່ມຂຶ້ນເລື້ອຍໆສະເລ່ຍ 2.000 ຄົນຕໍ່ມື້.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: dailynews