ລາຍງານຂອງອົງການພະຍາດລະບາດສັດລະຫວ່າງປະເທດຊຶ່ງລະບຸວ່າມີການລະບາດຂອງພະຍາດອະຫິວາໝູອາຟຣິກາໃນ ສປປ ລາວ ໃນນັ້ນ ພົບຢູ່ໃນ 7 ບ້ານຢູ່ໃນແຂວງສາລະວັນ ສົ່ງຜົນໃຫ້ມີໝູຕາຍກວ່າ 973 ໂຕ ຂໍ້ມູນດັ່ງກ່າວໄດ້ຮັບການຢັ້ງຢືນຈາກກົມລ້ຽງສັດ ແລະ ການປະມົງ ກະຊວງກະສິກຳ ແລະ ປ່າໄມ້ຂອງລາວເມື່ອວັນທີ 20 ມິຖຸນາຜ່ານມາ.
ຂະນະທີ່ລາຍງານລະບຸອີກວ່າ ການລະບາດໃນຄັ້ງນີ້ເກີດຂຶ້ນໃນ 7 ບ້ານໃນເມືອງຕຸ້ມລານ ແຂວງສາລະວັນ ຊຶ່ງປະກອບມີ ບ້ານສາ ມັກຄີໄຊ ບ້ານດິນດາກ ບ້ານໂພນງາມ ບ້ານແກ້ງຮັງ ບ້ານນາລະຈາງ ບ້ານຫ້ວຍຫວ້າ ແລະ ບ້ານນາຮ່ອງໃຫຍ່ ໂດຍການລະບາດຄັ້ງທຳອິດເລີ່ມແຕ່ວັນທີ 2 ມິຖຸນາ 2019 ແລະ ໄດ້ຮັບການຢັ້ງຢືນຢ່າງເປັນທາງການເມື່ອວັນທີ 17 ມິຖຸນາ 2019 ທີ່ຜ່ານມາ.
ສຳລັບມາດຕະການຄວບຄຸມການແຜ່ລະບາດຂອງພະຍາດດັ່ງກ່າວທີ່ທາງການໄດ້ດຳເນີນການແລ້ວຄື ຄວບຄຸມການເຄື່ອນຍ້າຍໝູ ແລະ ຜະລິດຕະພັນໝູພາຍໃນປະເທດ ການຂ້າເຊື້ອ ອະນຸຍາດໃຫ້ມີການສັກຢາວັກຊີນ (ວັກຊີນທີ່ສາມາດນຳໃຊ້ໄດ້) ສ່ວນມາດຕະການທີ່ຈະດຳເນີນຕໍ່ໄປກໍຄື ຕິດຕາມກວດການອກພື້ນທີ່ຈຳກັດ ຫຼື ພື້ນທີ່ປ້ອງກັນ ຕິດຕາມກວດກາພາຍໃນພື້ນທີ່ຈຳກັດ ຫຼື ປ້ອງ ກັນ ແລະ ກຳຈັດພະຍາດດັ່ງກ່າວດ້ວຍວິທີການທີ່ຮັດກຸມ.
ພະຍາດອະຫິວາໝູອາຟຣິກາມີການແຜ່ລະບາດໃນໝູ ຊຶ່ງຈະບໍ່ມີຜົນກະທົບທາງສຸຂະພາບ ແລະ ບໍ່ສາມາດຕິດຕໍ່ສູ່ຄົນໄດ້ ຊຶ່ງເມື່ອປະມານເດືອນສິງຫາ 2018 ຜ່ານມາໄດ້ເກີດການແຜ່ລະບາດໃນປະເທດຈີນ ແລະ ເຂົ້າສູ່ຫວຽດນາມເມື່ອຕົ້ນປີຜ່ານມາ.
ຮຽບຮຽງ: ສະຫະລັດ ວອນທິວົງໄຊ