ໃນວາລະດຳເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໃນວັນທີ 20 ມິຖຸນາ 2019 ທ່ານ ຄຳໝັ້ນ ສູນວິເລີດ ລັດຖະມົນຕີກະຊວງພາຍໃນ ໄດ້ຂຶ້ນຜ່ານຮ່າງກົດໝາຍວ່າດ້ວຍເອກະສານສະບັບສ້າງໃໝ່ ຫຼັງຈາກນັ້ນ ບັນດາສະມາຊິກສະພາແຫ່ງຊາດ (ສສຊ) ກໍໄດ້ປະກອບຄຳຄິດຄຳເຫັນໃສ່ຮ່າງກົດໝາຍດັ່ງກ່າວ ໂດຍລວມແລ້ວແມ່ນເຫັນດີເປັນເອກະພາບທາງດ້ານໂຄງສ້າງ ແລະ ເນື້ອໃນ ແຕ່ຍັງມີ ສສຊ ບາງທ່ານສະເໜີໃຫ້ຕັດອອກ ແລະ ຕື່ມບາງຄຳສັບທີ່ເຫັນວ່າຍັງບໍ່ຖືກຕ້ອງ ຮັດກຸມ ແລະ ບໍ່ສອດຄ່ອງຕາມແນວທາງເທົ່າທີ່ຄວນ.
ຮ່າງກົດໝາຍວ່າດ້ວຍເອກະສານປະກອບມີ 10 ພາກ 16 ໝວດ 100 ມາດຕາ ສ້າງຂຶ້ນເພື່ອເປັນບ່ອນອີງໃຫ້ແກ່ບັນດາອົງ ການຈັດຕັ້ງ ຂັ້ນສູນກາງ ແລະ ທ້ອງຖິ່ນ ຈັດຕັ້ງປະຕິບັດວຽກງານຄຸ້ມຄອງ ແລະ ສຳເນົາເອກະສານໃຫ້ມີຄວາມເອກະພາບ ເປັນລະບົບໃນຂອບເຂດທົ່ວປະເທດ.
ທ່ານ ນາງ ແສງສຸວັນ ຊຸຍພະສິດ ສະມາຊິກສະພາແຫ່ງຊາດເຂດເລືອກຕັ້ງທີ 15 ແຂວງຈຳປາສັກໄດ້ມີຄຳເຫັນໃນມາດຕາ 62 ການປົກປັກຮັກສາເອກະສານຂອງອົງການຈັດຕັ້ງ ໂດຍທ່ານໄດ້ສະເໜີໃຫ້ອົງການຈັດຕັ້ງຂັ້ນສູງກາງ ແລະ ທ້ອງຖິ່ນສ້າງຫ້ອງສຳ ເນົາເອກະສານ ຫຼື ສະຖານທີ່ປົກປັກຮັກສາເອກະສານໃຫ້ເປັນຮູບປະທຳ ປະກອບວັດຖຸອຸປະກອນ ແລະ ນຳໃຊ້ວິທະຍາສາດເຕັກໂນໂລຊີທີ່ທັນສະໄໝເພື່ອປົກປັກຮັກສາເອກະສານໃຫ້ມີຄວາມເປັນລະບຽບຮຽບຮ້ອຍ ງ່າຍຕໍ່ການຄົ້ນຫາ ແລະ ອື່ນໆ.
ພ້ອມດຽວກັນນັ້ນ ບັນດາ ສສຊ ຍັງໄດ້ປະກອບຄຳເຫັນໃສ່ມາດຕາ 2 ວ່າດ້ວຍເອກະສານ ມາດຕາ 8 ລັກສະນະເອກະສານ ມາດ ຕາ 9 ເອກະສານທົ່ວໄປ ມາດຕາ 10 ເອກະສານປະຫວັດສາດ ຊຶ່ງ ສສຊ ໄດ້ສະເໜີໃຫ້ຄະນະຮັບຜິດຊອບເບິ່ງຄືນ ແລະ ອະທິບາຍຄຳສັບໃຫ້ລະອຽດ ຈະແຈ້ງ ຮັດກຸມຂຶ້ນກວ່າເກົ່າ ແນໃສ່ໃຫ້ຮ່າງກົດໝາຍດັ່ງກ່າວມີຄວາມຈະແຈ້ງ ສົມບູນ ສອດຄ່ອງກັບແນວທາງ ແລະ ນະໂຍບາຍຂອງພັກ-ລັດວາງອອກ.
ໂດຍ: ສະຫະລັດ ວອນທິວົງໄຊ