ອາຍຸເປັນພຽງໂຕເລກຖ້າຍັງມີໄຟ ບໍ່ວ່າອາຍຸເທົ່າໃດກໍຍັງເຮັດວຽກໄດ້! ປັດຈຸບັນ ສ.ເກົາຫຼີ ກຳລັງຜະເຊີນບັນຫາໂຕເລກຜູ້ອາຍຸສູງເພີ່ມຂຶ້ນເລື້ອຍໆ ຢ່າງໜ້ອຍການເຮັດວຽກກໍສາມາດຊ່ວຍໃຫ້ບັນດາຜູ້ສູງໄວບໍ່ຕ້ອງເຫງົາຢູ່ບ້ານພຽງລຳພັງ.
ຂະນະທີ່ບໍລິສັດ EverYoung ຊຶ່ງເປັນລິສັດສະຕາຣດອັບກາຍເປັນຂ່າວໄປທົ່ວປະເທດ ເມື່ອນະໂຍບາຍການຈ້າງງານທີ່ບໍ່ມີບໍລິສັດໃດໃນ ສ.ເກົາຫຼີ ກ້າເຮັດນັ້ນກໍຄື ຜູ້ທີ່ຈະເຂົ້າມາເຮັດວຽກຕ້ອງມີອາຍຸຕັ້ງແຕ່ 55 ປີຂຶ້ນເທົ່ານັ້ນ ທີ່ເປັນແບບນີ້ກໍຍ້ອນວ່າເຈົ້າຂອງບໍລິສັດຍັງຄົງເຊື່ອໝັ້ນໃນທ່າແຮງບົ່ມຊ້ອນຂອງກຸ່ມຄົນໄວກະສຽນ ແລະ ຕ້ອງການຕໍ່ສູ້ກັບວັດທະນະທຳໃນອົງກອນຂອງ ສ.ເກົາຫຼີ ທີ່ມີການເລືອກປະຕິບັດທາງອາຍຸຄື ຍິ່ງອາຍຸຫຼາຍຂຶ້ນຍິ່ງມີໂອກາດຫວ່າງງານ.
ສ່ວນບໍລິສັດຫຼາຍແຫ່ງໃນ ສ.ເກົາຫຼີ ສ່ວນໃຫຍ່ແມ່ນບັງຄັບໃຫ້ພະນັກງານກະສຽນກ່ອນເຖິງອາຍຸທີ່ກົດມາຍກຳນົດໄວ້ຄື 60 ປີ ທັງນີ້ ປະທານບໍລິສັດ EverYoung ເບິ່ງເຫັນທ່າແຮງ ແລະ ຍັງເຊື່ອໝັ້ນດ້ານສີມື ແລະ ປະສົບການຂອງຄົນກຸ່ມນີ້ ຈຶ່ງໄດ້ເປີດບໍລິ ສັດ EverYoung ຂຶ້ນມາເມື່ອ 6 ປີກ່ອນເພື່ອຮອງຮັບພະນັກງານໄວກະສຽນໂດຍສະເພາະ ໃນນັ້ນ ລວມມີພະນັກງານໄວກະສຽນຈາກຫຼາກຫຼາຍສາຂາອາຊີບຫຼາຍກວ່າ 420 ຄົນພາຍໃນບໍລິສັດ.
ສຳລັບຄົນທີ່ໄດ້ເຂົ້າມາເຮັດວຽກໃນບໍລິສັດແຫ່ງນີ້ກໍຈະຖືກຝຶກອົບຮົມໃຫ້ໃຊ້ແພລຕຟອມ Never ຫຼື ກູເກິລໃນເວີເຊິນຂອງ ສ.ເກົາຫຼີ ເພື່ອໃຫ້ກວດກາຂໍ້ມູນ ຫຼື ເນື້ອຫາທີ່ບໍ່ເໝາະສົມທັງໃນ Never Map ແລະ ໃນບລ໋ອກ ລວມທັງຝຶກທັກສະດ້ານໄອທີຕ່າງໆ ຂະນະທີ່ EverYoung ກຳນົດໃຫ້ທຸກຄົນເຮັດວຽກມື້ລະ 4 ຊົ່ວໂມງ ໂດຍທຸກ 50 ນາທີຈະໃຫ້ພັກ 10 ນາທີ ຊຶ່ງທາງບໍລິສັດໄດ້ຈັດກຽມຫ້ອງພັກຜ່ອນສຳລັບດື່ມນ້ຳຊາ ອ່ານໜັງສື ພ້ອມສິ່ງອຳນວຍຄວາມສະດວກ ແລະ ອື່ນໆ.
ຮຽບຮຽງ: ສະຫະລັດ ອວນທິວົງໄຊ
ຮູບພາບ: posttoday